- રેસકોર્સ સ્થિત આઈડીબીઆઈ બેંકની મુખ્ય શાખા બહાર મોટી સંખ્યામાં બેંક કર્મચારીઓ અને અધિકારીઓ એકઠા થયા હતા, નોકરીની સુરક્ષા અને નિવૃત્તિના લાભો કપાવાની કર્મચારીઓને ભીતિ

સરકાર દ્વારા આઈડીબીઆઈ (IDBI) બેંકના ખાનગીકરણ કરવાનો નિર્ણય લેવામાં આવ્યો છે, જેને પગલે બેંકના કર્મચારીઓમાં ખૂબ જ ભારે અસંતોષ અને રોષની લાગણી વ્યાપી ગઈ છે. પોતાના ભવિષ્યની સુરક્ષા અને પડતર માંગણીઓને લઈને આઈડીબીઆઈ બેંકના કર્મચારીઓએ ખાનગીકરણના વિરોધમાં આક્રમક વલણ અપનાવ્યું છે અને આજથી દેશવ્યાપી હડતાલનું શસ્ત્ર ઉગામ્યું છે.

આ વિરોધ પ્રદર્શનના ભાગરૂપે વડોદરા શહેરના રેસકોર્સ વિસ્તારમાં આવેલી આઈડીબીઆઈ બેંકની મુખ્ય શાખા બહાર મોટી સંખ્યામાં બેંક કર્મચારીઓ અને અધિકારીઓ એકઠા થયા હતા. તેમણે હાથમાં બેનરો લઈને સરકાર વિરુદ્ધ જોરદાર સૂત્રોચ્ચાર કર્યા હતા અને પોતાનો ઉગ્ર વિરોધ નોંધાવ્યો હતો. આ હડતાલના કારણે બેંકિંગ સેવાઓને માઠું ગ્રહણ લાગ્યું છે અને સામાન્ય ગ્રાહકોને પણ હાલાકી ભોગવવાનો વારો આવ્યો છે.

હડતાલ પર ઉતરેલા કર્મચારીઓએ પોતાની ગંભીર ચિંતાઓ વ્યક્ત કરી હતી. કર્મચારીઓનું સ્પષ્ટપણે માનવું છે કે જો આઈડીબીઆઈ બેંકનું ખાનગીકરણ કરવામાં આવશે, તો તેમની નોકરીની સુરક્ષા છીનવાઈ જશે અને તેમનું ભવિષ્ય તદ્દન અંધકારમય તથા જોખમમાં મુકાઈ જશે. આ ઉપરાંત ખાનગીકરણ થવાથી તેમને મળતા વિવિધ ભથ્થાં, નિવૃત્તિના લાભો અને અન્ય આર્થિક સુવિધાઓ પર કાપ મૂકાશે, જેના કારણે કર્મચારીઓએ મોટું આર્થિક નુકસાન સહન કરવું પડશે. ખાનગી માલિકી હેઠળ કર્મચારીઓનું શોષણ થવાની ભીતિ પણ સેવાઈ રહી છે. કર્મચારીઓનું કહેવું છે કે બેંકને સફળ બનાવવામાં વર્ષોથી તેમનું મહત્વનું યોગદાન રહ્યું છે, ત્યારે સરકારનો આ નિર્ણય તેમની સાથે વિશ્વાસઘાત સમાન છે.

આ વિરોધ પ્રદર્શન દ્વારા બેંક કર્મચારીઓએ સરકાર સમક્ષ એકસૂરે માંગ કરી છે કે આઈડીબીઆઈ બેંકના ખાનગીકરણનો નિર્ણય તાત્કાલિક ધોરણે પાછો ખેંચવામાં આવે. કર્મચારીઓ ઈચ્છે છે કે આઈડીબીઆઈ બેંકનું સરકારી માળખું જાળવી રાખવામાં આવે જેથી કર્મચારીઓના હિતોનું રક્ષણ થઈ શકે અને બેંકિંગ ક્ષેત્રમાં પણ સ્થિરતા જળવાઈ રહે. જો સરકાર દ્વારા તેમની માંગણીઓ પ્રત્યે યોગ્ય ધ્યાન આપવામાં નહીં આવે અને ખાનગીકરણની પ્રક્રિયા આગળ ધપાવવામાં આવશે, તો આગામી દિવસોમાં આ આંદોલનને વધુ તેજ અને વ્યાપક બનાવવાની કર્મચારી સંગઠનોએ ચીમકી આપી છે.