- પર્યાવરણ અને ઊર્જા બચત માટે સાયકલ દ્વારા હાલોલની પ્રાકૃતિક યુનિવર્સિટીમાં જશે

ગુજરાતના રાજ્યપાલ આચાર્ય દેવવ્રતજીએ પબ્લિક ટ્રાન્સપોર્ટના ઉપયોગનું વધુ એક ઉત્કૃષ્ટ અને પ્રેરણાદાયી ઉદાહરણ પૂરું પાડ્યું છે.તેઓ હાલોલની મુલાકાતે જવાના હતા ત્યારે તેઓ ગાંધીનગરથી ટ્રેન મારફતે વડોદરા અને વડોદરાથી એસટી બસ મારફતે હાલોલ જવા રવાના થયા હતા.

વડોદરા સેન્ટ્રલ બસ સ્ટેન્ડ ખાતે આવી પહોંચેલા રાજ્યપાલે મીડિયા સાથે વાતચીત કરી હતી. તેઓ ગાંધીનગરથી વડોદરા સુધી ટ્રેનમાં મુસાફરી કરીને આવ્યા હતા અને વડોદરાથી હાલોલ જવા માટે ગુજરાત રાજ્ય પરિવહન નિગમની એસ.ટી. બસ મારફતે ગયા હતા. રાજ્યપાલે જણાવ્યું હતું કે પશ્ચિમ એશિયામાં સર્જાયેલા તેલ સંકટને ધ્યાનમાં રાખીને વડાપ્રધાન નરેન્દ્ર મોદીએ દેશવાસીઓને તેલ બચાવવાની ખાસ અપીલ કરી છે. આ અપીલને સાર્થક કરવા માટે તેમણે પોતે પહેલ કરી છે. તેમણે મક્કમતાપૂર્વક જણાવ્યું કે જ્યાં સુધી આ વૈશ્વિક તેલ સંકટ સમાપ્ત નહીં થાય, ત્યાં સુધી તેઓ હવાઈ સફર કે હેલિકોપ્ટર યાત્રા બિલકુલ નહીં કરે અને તેના બદલે વધુમાં વધુ રેલવે તથા એસ.ટી. બસ જેવા જાહેર પરિવહન માધ્યમોનો જ ઉપયોગ કરશે.

રાજ્યપાલે જણાવ્યું હતું કે, ઉચ્ચ પદો પર બેઠેલી વ્યક્તિઓ જ્યારે આવું ઉદાહરણ પૂરું પાડે, ત્યારે જ સામાન્ય જનતા પણ તેનાથી પ્રેરિત થઈને દેશહિતમાં સહભાગી બને છે. એસ.ટી. બસમાં તેમની આ ચોથી મુસાફરી છે, જે તેમની સાદગી અને પર્યાવરણ પ્રત્યેની પ્રતિબદ્ધતા દર્શાવે છે. તેઓએ નાગરિકોને પણ અપીલ કરી હતી કે પેટ્રોલ - ડીઝલનો ઓછામાં ઓછો ઉપયોગ કરો અને વડાપ્રધાનની અપીલને અનુસરવા અનુરોધ કર્યો હતો.

રાજ્યપાલ આચાર્ય દેવવ્રતજી હાલોલ સ્થિત પ્રાકૃતિક યુનિવર્સિટીમાં આયોજિત વૈજ્ઞાનિકો અને ખેડૂતોના એક વિશાળ મહાસંમેલનમાં હાજરી આપવાના છે. આ યાત્રા દરમિયાન પણ તેઓ પર્યાવરણની સુરક્ષાનો અનોખો સંદેશ આપશે. એસ.ટી. બસમાંથી ઉતર્યા બાદ તેઓ યુનિવર્સિટી સુધી પહોંચવા માટે કોઈપણ સરકારી વાહનનો ઉપયોગ કરવાને બદલે જાતે સાયકલ ચલાવીને જશે. હાલોલ ખાતેના કાર્યક્રમો પૂર્ણ કર્યા બાદ, તેઓ રાત્રિ રોકાણ કોઈ વીઆઈપી ગેસ્ટ હાઉસમાં કરવાને બદલે નજીકના એક ગામની સરકારી શાળામાં કરશે.

આ રાત્રિ વિશ્રામ દરમિયાન તેઓ સ્થાનિક ખેડૂતો અને ગ્રામજનો સાથે સીધો સંવાદ સાધશે, તેમજ જનસભા અને સંમેલનના વિવિધ કાર્યક્રમોમાં ભાગ લેશે. આ ઉપરાંત, સામાજિક સમરસતાનું ઉત્તમ ઉદાહરણ પૂરું પાડતા તેઓ ગામના એક અનુસૂચિત જાતિના પરિવાર સાથે રાત્રિ ભોજન પણ લેશે. બીજા દિવસે સવારે તેઓ ગામના નાના બાળકો સાથે યોગ ક્લાસમાં જોડાશે અને તેમને સ્વસ્થ જીવનશૈલીના પાઠ ભણાવશે. આ પ્રવાસ દરમિયાન રાજ્યપાલનો મુખ્ય ઉદ્દેશ્ય પ્રાકૃતિક ખેતીનો વ્યાપ વધારવાનો છે. તેમણે ભારપૂર્વક જણાવ્યું હતું કે, કેમિકલયુક્ત ઝેરી ખેતીના કારણે આપણી આવનારી પેઢીઓનું સ્વાસ્થ્ય અને અમૂલ્ય જમીન બંને સંપૂર્ણપણે બરબાદ થઈ રહ્યા છે. આ વિનાશને રોકવાનો એકમાત્ર ઉપાય પ્રાકૃતિક ખેતી છે, જેનાથી લોકોનું સ્વાસ્થ્ય, જમીનની ફળદ્રુપતા અને સમગ્ર પર્યાવરણનું રક્ષણ થઈ શકે છે. આથી જ તેમણે ગુજરાતના તમામ ખેડૂતોને રાસાયણિક ખાતરોનો ત્યાગ કરીને સત્વરે પ્રાકૃતિક ખેતી તરફ વળવા માટે હાર્દિક આગ્રહ કર્યો હતો. રાજ્યપાલના આ પગલાંને કારણે સમગ્ર વહીવટી તંત્ર અને આમ જનતામાં ઊર્જા સંરક્ષણ અને પર્યાવરણ પ્રત્યે એક સકારાત્મક જાગૃતિ જોવા મળી રહી છે.