- ભૂવાને કારણે મુખ્ય માર્ગ હોવાથી ક્યારેક ટ્રાફિકજામની સમસ્યા પણ સામે આવી

વડોદરા શહેરના ગોત્રી-સેવાસી રોડ પર ગોત્રી વિસ્તારમાં શૈશવ સ્કૂલ નજીક રોડ પર ભૂવો પડવાની ઘટના સામે આવી છે. જેના કારણે વાહનચાલકોને ભારે હાલાકીનો સામનો કરવો પડી રહ્યો છે. આ ભૂવાને કારણે મુખ્ય માર્ગ હોવાથી ક્યારેક ટ્રાફિકજામની સમસ્યા પણ સામે આવી રહી છે. હાલમાં તંત્ર દ્વારા ભૂવા (ખાડા)ને બેરિકેટિંગ કરવામાં આવ્યું છે.

ભૂવાની જાણ થતાં વડોદરા મહાનગરપાલિકા (VMC)ના તંત્ર દ્વારા તાત્કાલિક પગલાં લેવામાં આવ્યાં છે. સુરક્ષાને ધ્યાનમાં રાખીને ભૂવાની આજુબાજુ બેરિકેડ્સ મૂકી દેવામાં આવ્યા છે, જેથી વાહનચાલકોને આ વિસ્તારમાં સાવચેતી રાખવા માટે સૂચના મળે. જોકે, આ અસ્થાયી ઉપાયથી ટ્રાફિકની સમસ્યા હજુ પણ યથાવત્ રહી છે. કારણ કે, ભૂવાની સમારકામની કામગીરી હજુ શરૂ થઈ નથી.

સ્થાનિક વાહનચાલકો અને રહેવાસીઓએ જણાવ્યું કે, ગોત્રી-સેવાસી રોડ એક વ્યસ્ત માર્ગ છે, જેના પર દરરોજ હજારો વાહનોની અવરજવર થાય છે. ભૂવાને કારણે વાહનોને એક બાજુથી પસાર થવું પડે છે, જેના લીધે ટ્રાફિકજામની સ્થિતિ સર્જાય છે. ખાસ કરીને સવારે અને સાંજે સ્કૂલ અને ઓફિસના સમયે આ સમસ્યા વધુ ગંભીર બની જાય છે. વાહનચાલકોએ તંત્રને આગ્રહ કર્યો છે કે, ભૂવાની સમારકામની કામગીરી ઝડપથી શરૂ કરવામાં આવે, જેથી ટ્રાફિકની સમસ્યા ઘટે અને મુસાફરોને રાહત મળે.

ગોત્રી-સેવાસી રોડના રહેવાસીઓ અને વાહનચાલકોએ તંત્રને અપીલ કરી છે કે, ભૂવાની સમારકામની કામગીરી ઝડપથી પૂર્ણ કરવામાં આવે. ભવિષ્યમાં આવી સમસ્યાઓ ન સર્જાય તે માટે રસ્તાઓની નિયમિત જાળવણી કરવામાં આવે તેવી માંગ કરી છે. આ ઘટના શહેરના રસ્તાઓની જાળવણી અને ટ્રાફિક વ્યવસ્થાપનના મુદ્દાઓને ફરી એકવાર ચર્ચામાં લાવી છે. હવે જોવાનું રહેશે કે તંત્ર આ સમસ્યાનું કેટલી ઝડપથી નિરાકરણ લાવે છે અને વાહનચાલકોને રાહત આપે છે.