- નૈતિક પટેલ સાથે થયેલા ઝઘડાનો મામલો, લોકેશ શર્મા સહિત શખ્સો મહિલાના ઘરે પહોંચ્યા હતા

- પત્નીને 'ઉપાડી લેવાની' ધમકી આપનાર શખ્સો સામે માંજલપુર પોલીસમાં ફરિયાદ

વડોદરા શહેરના માંજલપુર વિસ્તારમાં પાણીપુરીના હિસાબને લઈને શરૂ થયેલો માથાકૂટ મામલે ફરિયાદ નોંધાઈ છે. ફરિયાદી મહિલાને જાહેરમાં ધમકી આપતા સમગ્ર મામલો પોલીસ મથકે પહોંચ્યો હતો. માંજલપુર વિસ્તારમાં આવેલા હરીધામ ફ્લેટ્સમાં રહેતા અને મૂળ શિવમ ફ્લેટ્સના રહેવાસી પાયલબેન નૈતિકભાઈ પટેલ (ઉ.વ. 28) દ્વારા આ મામલે પોલીસ સ્ટેશનમાં લેખિત ફરિયાદ નોંધાવવામાં આવી છે.

ઘટનાની શરૂઆત અલવાનાકા પાસે આવેલા પુજીબા નગરમાં લોકેશ શર્મા સાથે પાણીપુરીના પૈસા બાબતે થયેલા ઝઘડાથી થઈ હતી. આ બાબતની જાણ ફરિયાદીને તેમના પતિએ ફોન કરીને કરી હતી. ત્યારબાદ, સાંજના સમયે ફરિયાદી મહિલાના જેઠનો ફોન આવ્યો હતો અને તેમણે જણાવ્યું હતું કે નૈતિક સાથે ઝઘડો કરનાર લોકેશ શર્મા, બાલા ઐયર, નિલેશ કહાર, નાગેશ કહાર, ઉત્તમભાઈ, બાબુભાઈ, પ્રશાંત પંચાલ, રાજા શર્મા તેમજ અન્ય બે વ્યક્તિઓ તેમના ઘરે નૈતિકનું પૂછવા આવ્યા હતા. આ શખ્સોએ ઘરની બહાર ઊભા રહીને ગંદી ગાળો બોલીને હોબાળો મચાવ્યો હતો.

મામલો આટલેથી અટક્યો નહીં, પરંતુ રાત્રિના આશરે દસ વાગ્યે જ્યારે ફરિયાદી માંજલપુર સરસ્વતી ચોકડીથી પોતાના ઘર તરફ જઈ રહ્યા હતા, ત્યારે સરસ્વતી ચોકડી પર લોકેશ શર્મા, બાલા ઐયર તથા રાકેશ કહાર બેઠેલા હતા. ત્યાંથી પસાર થતી વખતે પાયલબેનને જોઈને લોકેશ શર્માએ અન્ય શખ્સો સમક્ષ જાહેરમાં ઉશ્કેરણીજનક ટિપ્પણી કરી હતી.

લોકેશ શર્માએ જણાવ્યું હતું કે આ નૈતિક પટેલની પત્ની છે તે જ્યાં જશે ત્યાં તેનો પતિ હશે અને તેનો પતિના મળે તો તેને ઉપાડી લઈ તેવી ગર્ભિત ધમકી આપી હતી. આ ધમકી સાંભળીને ગભરાઈ ગયેલા ફરિયાદી મહિલાએ તાત્કાલિક ત્યાંથી ભાગી છૂટ્યા હતા અને ડરના માહોલમાં પોલીસ સ્ટેશન ખાતે પહોંચીને તમામ શખ્સો વિરુદ્ધ ફરિયાદ નોંધાવી છે.

આ મામલે માંજલપુર પોલીસ મથકમાં ફરિયાદ નોંધી વધુ તપાસ હાથ ધરી છે. આરોપી લોકેશ શર્મા એક જીમ સંચાલક અને રાજકીય નેતાઓ સાથેના અસંખ્ય ફોટો સોશિયલ મીડિયામાં મૂકેલા જણાયા છે. ત્યારે હાલમાં પોલીસે મહિલાની ફરિયાદ આધારે કાર્યવાહી કરી વધુ તપાસ હાથ ધરી છે.