- બૂટલેગરે પોલીસની ગાડી પર બે રાઉન્ડ ફાયરિંગ કર્યું હતું, કૂખ્યાત બૂટલેગર સહિત 8ને વોન્ટેડ જાહેર કરાયા હતા, ધરપકડ ટાળવા નાસતા ફરતો હોવાનું બહાર આવ્યું
- આરોપી સામે રાજ્યભરના વિવિધ પોલીસ સ્ટેશનોમાં 66 જેટલા ગુના નોંધાયેલા છે
વડોદરાના દરજીપુરા વિસ્તારમાં દરોડા પાડવા ગયેલી SMC (સ્ટેટ મોનિટરિંગ સેલ)ની ટીમ પર હુમલો કરવાના કેસ વોન્ટેડ આરોપી ઝુબેર મેમણને વડોદરા ક્રાઈમ બ્રાન્ચે ઝડપી પાડયો છે. ઝુબેર મેમણ સામે રાજ્યભરના વિવિધ પોલીસ સ્ટેશનમાં 66 જેટલા ગુના નોંધાયેલા છે.
20 દિવસ પહેલા વડોદરા શહેરના વડોદરા-મુંબઈ નેશનલ હાઇવે ઉપર આવેલા દરજીપુરા બ્રિજની સામે વી.ટ્રાન્સ કંપનીના ગોડાઉનની બાજુમાં આવેલા ખુલ્લા પાર્કિંગ પ્લોટમાં બૂટલેગર ઝુબેર શફીક મેમણ કન્ટેનરમાંથી નાની ગાડીઓમાં દારૂ ભરાવી કટિંગ કરી રહ્યો હતો. આ પ્રકારની બાતમી મળતાં વહેલી સવારે 4થી 5 વાગ્યા વચ્ચે SMCની ટીમે સ્થળે દરોડો પાડયો હતો. આ દરમિયાન બૂટલેગરોએ સ્ટેટ મોનિટરિંગની ટીમ ઉપર પથ્થરમારો કરતાં SMCના પીઆઇ આર. જી. ખાટે બૂટલેગરની કન્ટેનર ગાડી ઉપર બે રાઉન્ડ ફાયરિંગ કર્યું હતું.
ફાયરિંગ થતાંની સાથે કુખ્યાત બૂટલેગર ઝુબેર શફીક મેમણ સહિતના આઠ શખસ ફરાર થઈ ગયા હતા. આ ઘટનામાં સ્ટેટ મોનિટરિંગ સેલે ત્રણ બૂટલેગરની ધરપકડ કરી છે, સાથે જ એક ફોર્ચ્યુનર કાર, એક કન્ટેનર અને અંદાજિત 22 લાખના દારૂ સહિત 60 લાખનો મુદ્દામાલ પોલીસે કબજે કર્યો હતો. આ ઘટનામાં કુખ્યાત બૂટલેગર ઝુબેર શફીક મેમણ સહિત અન્ય આઠને વોન્ટેડ જાહેર કરવામાં આવ્યા હતા.
આ દરમિયાન વડોદરા ક્રાઈમ બ્રાન્ચને બાતમી મળી હતી કે, રીઢો આરોપી ઝુબેર સફી મેમણ (રહે.વાડી, વડોદરા) આણંદ જીલ્લાના તારાપુર પાસેના જલ્લા ગામે ખાતે આવેલા ફાર્મમાં આશ્રય લઇ રહ્યો છે. જેથી વડોદરા ક્રાઇમ બ્રાન્ચની ટીમે તારાપુર ખાતેના જલ્લા ગામના ફાર્મ હાઉસમાં પહોંચી ગઈ હતી. આ સમયે ઝુબેરે ભાગવાનો પ્રયાસ કર્યો હતો, પરંતુ આરોપીને પોલીસે આરોપીને ઝડપી પાડ્યો હતો. આરોપીની પૂછપરછમાં વડોદરાના હરણી પોલીસ સ્ટેશન ઉપરાંત આણંદ જિલ્લાના આંકલાવ પોલીસ સ્ટેશનનો વિદેશી દારૂનો ગુનામાં તેમજ દાહોદ જિલ્લાના સંતરામપુર પોલીસ સ્ટેશનનો વિદેશી દારૂનો ગુનામાં સંડોવાયેલ હોવાનું અને આ ગુનાઓના ધરપકડ ટાળવા માટે નાસતા ફરતો હોવાનું બહાર આવ્યું હતું.
ઝુબેર શફીક મેમણ સામે વડોદરા શહેરના વિવિધ પોલીસ સ્ટેશનો ઉપરાંત, સુરત, નવસારી, પંચમહાલ, વલસાડ, મહેસાણા, ભરૂચ, ગાંધીનગર અને આણંદ જિલ્લાના વિવિધ પોલીસ સ્ટેશનમાં 66 જેટલા પ્રોજીબીશન સહિતના ગુનાઓ નોંધાયેલા છે.
