- ફાયર વિભાગે 16 બોટની માંગણી કરી હતી, પરંતુ સ્થાયી સમિતિએ 8 બોટને મંજૂરી આપી
- ગત વર્ષના પૂરના અનુભવ બાદ તૈયારીઓ તેજ કરાઈ
- અન્ય સાધનોમાં જનરેટર, લાઈફ જેકેટ, ટોર્ચ, ટ્રી કટર વગેરેનો સમાવેશ થાય છે, દરેક ફાયર સ્ટેશન પર બે બોટ રાખવાનું આયોજન છે
વડોદરા શહેરે ગત વર્ષે ભારે વરસાદ અને પૂરનો સામનો કર્યો હતો, જેને પગલે અનેક વિસ્તારો પાણીમાં ગરકાવ થયા હતા અને નાગરિકોને મોટું નુકસાન થયું હતું. આ પરિસ્થિતિને ધ્યાનમાં રાખીને રાજ્ય સરકારે વડોદરામાં પૂર નિયંત્રણ અને વિશ્વામિત્રી નદીના સંવર્ધન માટે 1200 કરોડ રૂપિયાની ફાળવણી કરી છે. હાલ નદીને ઊંડી અને પહોળી કરી તેની વહન ક્ષમતા વધારવાની કામગીરી ચાલી રહી છે. આ ઉપરાંત, વડોદરા મ્યુનિસિપલ કોર્પોરેશન દ્વારા પૂર સામે તાત્કાલિક તૈયારી માટે નોંધપાત્ર પગલાં લેવામાં આવ્યાં છે.
વડોદરા ફાયર વિભાગને 16 બોટની માંગણી કરી હતી. જેમાંથી 8 નવી બોટ, ફ્લડ લાઇટ સહિતના આધુનિક સાધનોથી સજ્જ કરવામાં આવ્યો છે. ફાયર વિભાગે 16 બોટની માંગણી કરી હતી, પરંતુ સ્થાયી સમિતિએ 8 બોટને મંજૂરી આપી છે, જે હાલ પાણીગેટ ફાયર સ્ટેશન ખાતે રાખવામાં આવી છે. આ સાથે વિભાગે આગામી સમયમાં વધુ 8 બોટ ખરીદવા માટે દરખાસ્ત રજૂ કરવાની યોજના બનાવી છે, જેથી દરેક ફાયર સ્ટેશન પર બે બોટ ઉપલબ્ધ હોય અને પૂરની કોઈપણ પરિસ્થિતિમાં તાત્કાલિક પહોંચી શકાય.
જોકે, આગામી ચોમાસા પૂર્વે માનવબળની બાબતમાં પાલિકા હજુ પૂરતી તૈયાર નથી. 200 તરવૈયાઓને ત્રિમાસિક કરાર પર ભરતી કરવાની દરખાસ્ત મંજૂર થઈ છે, પરંતુ તેનો અમલ હજુ થયો નથી. આના કારણે પૂરના જોખમવાળા વિસ્તારોમાં તાત્કાલિક બચાવ કામગીરી માટે જરૂરી કર્મચારીઓની ઉપલબ્ધતા સુનિશ્ચિત નથી. ચોમાસાને હવે એક મહિનાથી ઓછો સમય બાકી હોવાથી આ ભરતી તાત્કાલિક પૂર્ણ કરવી જરૂરી છે.
ચીફ ફાયર ઓફિસર મનોજ પાટીલના જણાવ્યા અનુસાર, ફાયર વિભાગ આગામી ચોમાસામાં પૂરની કોઈપણ પરિસ્થિતિનો સામનો કરવા સંપૂર્ણ સજ્જ છે. નવી ખરીદેલી 8 બોટ ઉપરાંત ફ્લડ લાઇટ, લાઇફ જેકેટ, ટોર્ચ અને અન્ય સાધનો તમામ ફાયર સ્ટેશનોને આપવામાં આવશે.
પાલિકાએ 8 બોટ ઉપરાંત 8 જનરેટર સાથે ફ્લડ લાઇટ, 64 લાઇફ બોયા, 128 લાઇફ જેકેટ, 30 ટ્રી કટર, 50 હાઈ બીમ ટોર્ચ, 40 સ્પોટ લાઇટ ટોર્ચ, 16 મોસ્ક્યુટો નેટ, 50 સેફ્ટી હેલ્મેટ, 20 સ્ટ્રેચર, 20 રેસ્ક્યુ થ્રો બેગ અને 20 મલ્ટી પર્પઝ મેન્યુઅલ ટૂલની ખરીદી કરી છે. જરૂર પડે વધુ સાધનો પણ ખરીદવામાં આવશે. આ બોટ ન્યૂ લાઈટ સેફ્ટી સોલ્યુશન કંપની દ્વારા સપ્લાય કરાઈ છે અને યુનિરુબ ટેકનો ઈન્ડિયા પ્રાઇવેટ લિમિટેડ દ્વારા બનાવવામાં આવી છે. ઉલ્લેખનીય છે કે, તાજેતરમાં 200 જેટલા તરાપાની ખરીદી કરાઈ છે.
વડોદરા ફાયર વિભાગે પૂર નિયંત્રણ માટે નોંધપાત્ર તૈયારીઓ કરી છે, પરંતુ માનવબળની ભરતીમાં વિલંબ ચિંતાનો વિષય છે. ચોમાસાની નજીક આવતી તારીખોને ધ્યાનમાં રાખીને પાલિકાએ આ ખામીને તાત્કાલિક દૂર કરવી જરૂરી છે, જેથી શહેર પૂરની કોઈપણ પરિસ્થિતિનો સફળતાપૂર્વક સામનો કરી શકે.
