- ત્રણેય પૂતળાના ભવ્ય અને આકર્ષક દહન માટે અંદાજે 1 લાખના વિસ્ફોટક અને આકર્ષક ફટાકડા ખાસ ભરાશે, કુંભકર્ણ અને મેઘનાદની ઊંચાઈમાં એક-એક ફૂટનો ઘટાડો કરાયો

દશેરાના પાવન અવસર પર આ વર્ષે પરંપરાગત ઉત્સાહ અને દબદબા સાથે રાવણ દહનની ભવ્ય તૈયારીઓ પૂર્ણ થઈ ચૂકી છે. આજે 20મી ઓક્ટોબરે મંગળવારના રોજ દશેરાના દિવસે શહેરમાં આવેલા પોલોગ્રાઉન્ડ ખાતે અસત્ય પર સત્યના વિજયના પ્રતીક સમાન રાવણ, કુંભકર્ણ અને મેઘનાદના વિશાળ પૂતળાનું જાજરમાન દહન કરવામાં આવશે. પોલો ગ્રાઉન્ડ ખાતે રાવણ, મેઘનાદ અને કુંભકર્ણના પૂતળા મૂકવામાં આવશે જેનું દહન કરવામાં આવશે. ગત વર્ષ કરતા આ વર્ષે મેઘનાદ અને કુંભકર્ણના પૂતળાની ઊંચાઈ એક એક ફૂટ ઘટાડવામાં આવી છે.

આ વર્ષે આયોજનમાં વિશેષ આકર્ષણનું કેન્દ્ર રાવણનું પૂતળું રહેશે, જે 55 ફૂટની ઊંચાઈ સાથે મેઇન કેરેક્ટર એનર્જી અને વિશેષ રોયલ લુક સાથે ઊભું રહેશે. આ ત્રણેય રાક્ષસોના પૂતળા પૈકી કુંભકર્ણ અને મેઘનાદ ગત વર્ષની સરખામણીએ એક-એક ફૂટ ઠીંગણા રાખવામાં આવ્યા છે, જેના ભાગરૂપે કુંભકર્ણ આ વર્ષે 52 ફૂટનો અને મેઘનાદ 51 ફૂટનો તૈયાર કરવામાં આવ્યો છે. મંગળવારે સાંજે સંધ્યાકાળે રાવણ સહિતના ત્રણ પૂતળાનું દહન કરવામાં આવશે. રાવણ દહનના કાર્યક્રમને લઈને લોકોમાં પણ ભારે ઉત્સાહ જોવા મળી રહ્યો છે.

આ ભવ્ય પૂતળાઓને આકાર આપવા માટે ઉત્તર ભારત સાંસ્કૃતિક સંઘ દ્વારા આગ્રાથી વિશેષ 22 કારીગરોની કુશળ ટીમને બોલાવવામાં આવી હતી. આ તમામ કારીગરોએ અથાક પરિશ્રમ કરીને માત્ર 3 દિવસની અંદર દિવસ-રાત જોયા વગર આખો રાવણ પરિવાર તૈયાર કરી દીધો છે. આ પૂતળાઓને મજબૂતાઈ અને હળવાશ આપવા માટે વાંસ, લાકડી, મજબૂત રસ્સી અને કાગળનો ઉપયોગ કરવામાં આવ્યો છે. આશરે 500 માનવ કલાકોની જહેમત બાદ તૈયાર થયેલા આ પૂતળા મકરપુરા જીઆઈડીસીની એક કંપનીમાં સુરક્ષિત રીતે ઘડ, માથા અને પગના સ્વરૂપમાં છૂટા તૈયાર થઈને પડ્યા છે. જેને આજે સાંજે વિશેષ ટ્રેલરમાં ભરીને પોલોગ્રાઉન્ડ ખાતે લાવવામાં આવશે અને ત્યાં તેને ગોઠવવામાં આવશે.

ઉત્તર ભારત સાંસ્કૃતિક સંઘના પ્રમુખ એ.કે. મિશ્રાના જણાવ્યા અનુસાર, આ ત્રણેય પૂતળાના ભવ્ય અને આકર્ષક દહન માટે અંદાજે રૂપિયા 1 લાખની કિંમતના વિસ્ફોટક અને આકર્ષક ફટાકડા ખાસ ભરાવવામાં આવશે. જેમાં સૌથી વધુ રૂ. 40 હજારના ફટાકડા મુખ્ય આકર્ષણ સમાન રાવણના પૂતળામાં ભરાશે, જ્યારે રૂ. 30 - 30 હજારના ફટાકડા કુંભકર્ણ અને મેઘનાદના પૂતળામાં ગોઠવવામાં આવશે. આ ફટાકડાઓ ઉપરાંત પૂતળામાં શુદ્ધ ઘી અને કપૂર પણ રાખવામાં આવશે, જેથી દહનના સમયે પૂતળાનું ઝડપથી અને સુરક્ષિત રીતે પ્રજ્વલન થઈ શકે. દશેરાના મુખ્ય દિવસે આગ્રાથી વિશેષ 5 થી 6 કારીગરો ફરીથી સ્થળ પર આવશે અને આ પૂતળાની અંદર ફટાકડા ભરવાની અને તેને આખરી ઓપ આપવાની મહત્વપૂર્ણ કામગીરી સંભાળશે. પોલોગ્રાઉન્ડ ખાતે યોજાનારા આ ભવ્ય રાવણ દહન કાર્યક્રમમાં મોટી સંખ્યામાં નગરજનો ઉપસ્થિત રહીને આ પર્વની ઉજવણી કરશે તેવી અપેક્ષા રાખવામાં આવી રહી છે.