- સૂર્યનગરી એક્સપ્રેસ ટ્રેનના એન્જિનથી બીજા જનરલ કોચમાં ચોરી કરેલી ટ્રોલીબેગ, હેન્ડ બેગ, પિઠી બેગ અને લાલ કલરની થેલી સાથે બેઠેલા શખ્સને ઝડપી પાડવા બાન્દ્રા રેલવે પોલીસ દ્વારા માહિતી મળી હતી

બાન્દ્રા રેલવે સ્ટેશન પરથી એક પ્રવાસીના સોના-ચાંદીના દાગીના સહિતનો કિંમતી સામાન મૂકેલી ચાર બેગો મળી કુલ રૂપિયા ૧૨.૬૨ લાખની મત્તા ચોરીને ભાગેલા ચોરને વડોદરા રેલવે સ્ટેશન પરથી ઝડપી પાડવામાં આવ્યો હતો.

પ્રાપ્ત માહિતી મુજબ સૂર્યનગરી એક્સપ્રેસ ટ્રેનના એન્જિનથી બીજા જનરલ કોચમાં એક શખ્સ પોતાની સાથે ચોરીની બ્લ્યૂ કલરની ટ્રોલીબેગ, પર્પલ કલરની હેન્ડ બેગ, બ્લ્યૂ કાળા રંગની પિઠુ બેગ તેમજ લાલ કલરની થેલી સાથે મુસાફરી કરી રહ્યો છે. આ શખ્સને ઝડપી પાડવાની સૂચના વડોદરા રેલવે પોલીસને મળી હતી જેના પગલે આ ટ્રેન વડોદરા રેલવે પ્લેટફોર્મ નંબર-૪ પર આવતા કોચમાં પોલીસે તપાસ હાથ ધરી હતી.

બાન્દ્રા રેલવે પોલીસ દ્વારા મળેલી માહિતી મુજબનો શખ્સ ટ્રેનના કોચમાં મળતા તેને બેગો સાથે ઉતારી પોલીસ સ્ટેશન લાવી તેનું નામ પૂછતા રામનિવાસ નારાયણજી પલીયા (રહે.ઠક્કરબાપા કોલોની, ચેમ્બુર, મુંબઇ, મૂળ રાજસ્થાન) જાણવા મળ્યું હતું. તેની પાસેની બેગોમાંથી ચોરી થયેલા સોના-ચાંદીના દાગીના તેમજ કપડા મળી કુલ રૂપિયા ૧૨.૬૨ લાખની મત્તા મળી હતી. પોલીસે જણાવ્યું હતુ ંકે, આ ટ્રેનનું સ્ટોપેજ બાન્દ્રા બાદ સુરત છે પરંતુ સુરત થોડો સમય જ ટ્રેન ઊભી રહેતી હોવાથી ત્યાં પણ વોચ રાખવામાં આવી હતી કે કોઇ પ્રવાસી નીચે ઉતરતો તો નથી પરંતુ વડોદરા આવતા જ તેને ઝડપી પડાયો હતો.