- પુરાવા નાશ કરવા ચોર CCTVનું DVR લઈ ગયો, શંકાસ્પદ શખસ અન્ય કંપનીના CCTVમાં કેદ

- ફેક્ટરીમાંથી અંદાજિત 150 કિલોગ્રામ કરતાં પણ વધુ વજનના કોપર (તાંબા)ના પાઇપ, ફિટિંગ માટેના કેપિલરીના સામાન તેમજ ભંગારમાં રાખેલા તાંબાના ટુકડાઓની ચોરી થઇ

વડોદરા શહેરના બાપોદ પોલીસ સ્ટેશન વિસ્તારમાં એક ફેક્ટરીમાં મોડી રાત્રે ચોરીની મોટી ઘટના સામે આવી છે. GIDC વિસ્તારમાં રોડ નંબર 5 પર પ્લોટ નંબર 7માં ઓમ સાંઈ ઈન્ડસ્ટ્રીઝ નામની કંપનીમાં તસ્કરોએ ત્રાટકીને લાખો રૂપિયાના મુદ્દામાલની ચોરી કરી છે. સાથે કેમેરા માટે લગાવેલ DVR પણ ઉઠાવી ગયા હોવાનું સામે આવ્યું છે. આ મામલે બાપોદ પોલીસે વધુ તપાસ હાથ ધરી છે.

કંપનીના માલિક નિમિષ કવાએ જણાવ્યું હતું કે, ગત રાત્રે તેમની કંપનીમાં ચોરીનો આ બનાવ બન્યો હતો. ચોર એટલો હોશિયાર હતો કે કંપનીમાં લાગેલા 6 સીસીટીવી કેમેરાનું ડીવીઆર (DVR) પણ પોતાની સાથે ઉઠાવી ગયો હતો. જેથી કોઈ પુરાવા ન રહે. ફેક્ટરીમાંથી અંદાજિત 150 કિલોગ્રામ કરતાં પણ વધુ વજનના કોપર (તાંબા)ના પાઇપ, ફિટિંગ માટેના કેપિલરીના સામાન તેમજ ભંગારમાં રાખેલા તાંબાના ટુકડાઓની ચોરી થઈ છે. સ્ટોરમાંથી અન્ય કઈ નાની-મોટી વસ્તુઓ ગાયબ છે.

કંપનીના માલિકના જણાવ્યા અનુસાર, આસપાસની અન્ય કંપનીઓના સીસીટીવી ફૂટેજ ચકાસતા માલૂમ પડ્યું છે કે ચોર ફેક્ટરીના ઉપરના ભાગેથી એન્ગલ તોડીને અંદર ઘૂસ્યો હતો. ફૂટેજમાં આશરે પોણા પાંચ વાગ્યાની આસપાસ એક શંકાસ્પદ વ્યક્તિ ફેક્ટરીના છાપરા પરથી કૂદતો અને ત્યાંથી ગાડી પર કોપરની કોઈલ લઈને આ રોડ પરથી બહાર ભાગતો સાફ દેખાઈ રહ્યો છે.

આ સમગ્ર મામલે કંપનીના માલિક દ્વારા બાપોદ પોલીસ સ્ટેશનમાં અરજી આપીને ફરિયાદ નોંધાવવામાં આવી છે. બાપોદ પોલીસ સ્ટેશનનો સ્ટાફ તેમજ ડી-સ્ટાફની ટીમ ઘટનાસ્થળે પહોંચી આવી હતી. પોલીસે આસપાસના સીસીટીવી ફૂટેજ કબજે કરીને ચોરને પકડી પાડવા વધુ તપાસ હાથ ધરી છે.