- પ્રાથમિક તપાસમાં યુવક માનસિક રીતે અસ્વસ્થ હોવાનું બહાર આવતા પરિવારજનોને ત્રણ દિવસમાં યુવકના દાક્તરી પ્રમાણ પત્ર સાથે મુંબઈ પોલીસ સમક્ષ હાજર રહેવા નોટિસ ફટકારાઇ
સલમાન ખાનને ઘરમાં ઘૂસી મારી નાખવાની ધમકી આપવાના મામલામાં તપાસ વડોદરા સુધી પહોંચી છે. વાઘોડિયા તાલુકાના રવાલ ગામના યુવકે આ મેસેજ કર્યો હોવાનું બહાર આવ્યું છે. જોકે મુંબઈ પોલીસ અત્રે દોડી આવી હતી અને પૂછપરછ કરી હતી. જેમાં પ્રાથમિક તપાસમાં આ યુવક માનસિક રીતે અસ્વસ્થ હોવાનું બહાર આવ્યું છે.
મુંબઈ પોલીસના વરલી ટ્રાફિક કંટ્રોલ રૂમના વોટ્સએપ નંબર પર અભિનેતા સલમાન ખાનને જાનથી મારી નાખવાની ધમકી મળ્યા બાદ મુંબઈ પોલીસે એફઆઈઆર નોંધી હતી. આ મેસેજમાં અભિનેતાને તેના ઘરે મારી નાખવાની અને તેના વાહનમાં બોમ્બ લગાવવાની ધમકી આપવામાં આવી હતી. તપાસકર્તાઓએ ધમકીભર્યો મેસેજ મોકલનાર ગુજરાતના વડોદરા નજીકના રવાલ ગામના 26 વર્ષીય મયંક પંડ્યાને શોધી કાઢ્યો હતો.
વાઘોડિયા પોલીસ સ્ટેશનના પીઆઇ પૃથ્વીરાજસિંહ જાડેજાએ જણાવ્યું હતું કે, મુંબઈ પોલીસ દ્વારા અમને જાણ કરવામાં આવી હતી કે સલમાન ખાનને ધમકી ભર્યો મેસેજ રવાલ ગામમાંથી કરવામાં આવ્યો હતો. જેથી અમે આ બાબતે રવાલ ગામમાં જઈને તપાસ કરી હતી. આ દરમિયાન જાણવા મળ્યું હતું કે, રવાલ ગામમાં રહેતા 26 વર્ષીય મયંક પંડ્યા મેન્ટલી ડિસ્ટર્બ યુવકની છેલ્લા 12 વર્ષથી વડોદરાની હોસ્પિટલમાં સારવાર ચાલી રહી છે અને તેને સોશિયલ મીડિયાનો ખુબ શોખ છે અને તેને મિત્રો ન હોવાથી તે ગમે તે લિંક આવે તેમાં જોડાઈ જાય છે. આ દરમિયાન ધમકી ભર્યો મેસેજ મોકલી દીધો હતો. જેથી મુંબઈ પોલીસની ટીમે આવીને આ બાબતે તપાસ કરી હતી.
માનસિક અસ્થિર અને સારવાર લેતા મયંક પંડ્યાને 2-3 દિવસમાં વરલી પોલીસ સમક્ષ હાજર થવા નોટિસ ફટકારાઇ છે. અજાણ્યા વ્યક્તિ વિરુદ્ધ ભારતીય ન્યાય સંહિતાની કલમ 351 (2) (3) (ગુનાહિત ધાકધમકી) હેઠળ કેસ નોંધ્યો હતો. તપાસ શરૂ કરી હતી અને તેનો રેલો વાઘોડિયા તાલુકાના રવાલ ગામે પહોંચ્યો હતો. પરિણામે મુંબઈ પોલીસ ટેક્નિકલ સર્વેલન્સના આધારે વડોદરા જિલ્લાના વાઘોડિયા તાલુકાના રવાલ ગામે પહોંચી હતી પૂછપરછ દરમ્યાન ધમકી ભર્યો મેસેજ કરનાર યુવક મયંક પંડ્યાની માનસિક હાલત યોગ્ય નહીં હોવાનું બહાર આવ્યું છે. પરિણામે પરિવારજનોને મયંક પંડ્યાને ત્રણ દિવસમાં મુંબઈ પોલીસ સમક્ષ દાક્તરી પ્રમાણ પત્ર સાથે હાજર રહેવા જણાવ્યું છે.
ઉલ્લેખનીય છે કે, બોલિવૂડ એક્ટરને ફરી એકવાર જાનથી મારી નાખવાની ધમકી મળી હતી. મુંબઈના વર્લી વિસ્તારમાં સ્થિત પરિવહન વિભાગને એક અજાણ્યા વ્યક્તિએ મેસેજ મોકલીને સલમાન ખાનની કારને બોમ્બથી ઉડાવી દેવાની ધમકી આપી હતી. સલમાને મળેલી ધમકીના સંદર્ભમાં વરલી પોલીસ સ્ટેશનમાં FIR દાખલ કરવામાં આવી હતી.
રવિવારે મોડી રાત્રે મોકલવામાં આવેલા મેસેજમાં એવું પણ લખ્યું હતું કે- સલમાન ખાનના ઘરમાં ઘૂસીને તેને મારી નાખશે. ગયા વર્ષે 14 એપ્રિલે જ સલમાન ખાનના ગેલેક્સી એપાર્ટમેન્ટ પર ફાયરિંગની ઘટના બની હતી. આ હુમલાની જવાબદારી લોરેન્સ ગેંગે લીધી હતી. આ કેસમાં પોલીસે 7 લોકોની ધરપકડ કરી હતી. આમાંથી 2 આરોપીઓને જામીન મળી ગયા છે અને એક આરોપીએ આત્મહત્યા કરી લીધી છે.
