- યુવકના શરીર પરથી ઈજાના નિશાનો મળ્યા, પોસ્ટમોર્ટમ રિપોર્ટ બાદ મોતનું સાચું કારણ જાણવા મળશે

વડોદરા શહેરના ડેસર પોલીસ મથક હદ વિસ્તારમાં યુવકનો મૃતદેહ મળી આવતા ચકચાર મચી જવા પામી હતી. આ યુવકની હત્યા થઈ છે કે અન્ય કોઈ કારણોસર મોત થયું છે તે હજુ સ્પષ્ટ થયું નથી. યુવકના શરીર પરથી કેટલાક ઈજાના નિશાનો પણ મળી આવ્યા છે. જો કે પોસ્ટમોર્ટમ રિપોર્ટ બાદ આ યુવકના મોતનું સાચું કારણ જાણવા મળશે. હાલમાં આ મામલે પોલીસે વધુ તપાસ હાથ ધરી છે.

વડોદરા જિલ્લાના ડેસર વાલાવાવ એક પેટ્રોલપંપ નજીકના માર્ગ પાસેથી એક યુવકનો મૃતદેહ મળી આવ્યો હતો. મૃતકની ઓળખ ધર્મેશ પરમાર (રહે. નવા કેસરાના મુવાડા) તરીકે થઈ છે. મળતી માહિતી મુજબ, ધર્મેશ છેલ્લા બે દિવસથી ઘરેથી ગુમ હતો. આજે સ્થાનિક લોકોને મૃતદેહ જોવા મળતા તેમણે તાત્કાલિક જાણ કરી હતી.

ઘટનાની જાણ થતાં ડેસર પોલીસ તાત્કાલિક ઘટના સ્થળે પહોંચી ગઈ હતી અને વધુ તપાસ શરૂ કરી હતી. મૃતક યુવકના મૃતદેહને પોલીસે પોસ્ટમોર્ટમ માટે ખસેડ્યો હતો. આ યુવકનું મૃત્યુ કયા કારણોસર થયું છે તે હજુ સ્પષ્ટ થયુ નથી. યુવકના મોતને લઈ પરિવારજનોમાં હૈયાફાટ રુદન જોવા મળ્યું હતું. પરિવાર આ બનાવને લઈ શોકમાં છે. આ મામલે ડેસર પોલીસે વધુ તપાસ હાથ ધરી છે.