- સ્ટેટ મોનિટરિંગ સેલે એક ફોર્ચ્યુનર કાર, એક કન્ટેનર અને અંદાજિત 22 લાખના દારૂ સહિત 60 લાખનો મુદ્દામાલ પોલીસે કબજે કર્યો, 8 આરોપીઓ વોન્ટેડ જાહેર કર્યા
વડોદરાના દરજીપુરા વિસ્તારમાં દરોડા પાડવા ગયેલી SMC (સ્ટેટ મોનિટરિંગ સેલ)ની ટીમ પર હુમલો થતાં Plએ બે રાઉન્ડ ફાયરિંગ કરવાની ફરજ પડી હતી. વહેલી સવારે દારૂના ચાલતા કટિંગ પર SMCની ટીમ રેડ કરવા ગઈ તો બૂટલેગરોએ પથ્થરમારો શરૂ કરી દીધો હતો. આ હુમલામાં સ્ટેટ મોનિટરિંગ સેલનાં વાહનો અને કેટલાક કર્મીઓને ઇજા થઈ હોવાની માહિતી મળી હતી. આ ઘટનામાં સ્ટેટ મોનિટરિંગ સેલના Plએ સ્વબચાવમાં બે રાઉન્ડ ફાયરિંગ કર્યું હતું. આ મામલે સ્ટેટ મોનિટરિંગ સેલે ત્રણ આરોપીની ધરપકડ કરી છે, જ્યારે 8 આરોપીને વોન્ટેડ જાહેર કર્યા છે. હાલ આ મામલે આગળની તપાસ હરણી પોલીસે હાથ ધરી છે.
સ્ટેટ મોનિટરિંગ સેલને બાતમી મળી હતી કે, વડોદરા શહેરના વડોદરા-મુંબઈ નેશનલ હાઇવે ઉપર આવેલા દરજીપુરા બ્રિજની સામે વી. ટ્રાન્સ કંપનીના ગોડાઉનની બાજુમાં આવેલા ખુલ્લા પાર્કિંગ પ્લોટમાં બૂટલેગર ઝુબેર શફીક મેમણ કન્ટેનરમાંથી નાની ગાડીઓમાં દારૂ ભરાવી કટિંગ કરી રહ્યો છે. આ પ્રકારની બાતમી મળતાં વહેલી સવારે 4 થી 5 વાગ્યા વચ્ચે સ્ટેટ મોનિટરિંગ સેલની ટીમે સ્થળે દરોડો પાડયો હતો. આ દરમિયાન બૂટલેગરોએ સ્ટેટ મોનિટરિંગની ટીમ ઉપર પથ્થરમારો કરતાં એસએમસીના પીઆઇ આર. જી. ખાંટે બૂટલેગરની કન્ટેનર ગાડી ઉપર બે રાઉન્ડ ફાયરિંગ કર્યું હતું.
ફાયરિંગ થતાંની સાથે કુખ્યાત બૂટલેગર ઝુબેર શફીક મેમણ સહિતના આઠ શખસ ફરાર થઈ ગયા હતા. આ ઘટનામાં સ્ટેટ મોનિટરિંગ સેલે ત્રણ બૂટલેગરની ધરપકડ કરી છે, સાથે જ એક ફોર્ચ્યુનર કાર, એક કન્ટેનર અને અંદાજિત 22 લાખના દારૂ સહિત 60 લાખનો મુદ્દામાલ પોલીસે કબજે કર્યો છે. આ ઘટનામાં કુખ્યાત બૂટલેગર ઝુબેર શફીક મેમણ સહિત અન્ય આઠને વોન્ટેડ જાહેર કરવામાં આવ્યા છે. હાલ તમામ આરોપીઓ અને મુદ્દામાલને હરણી પોલીસ મથકને સોંપવામાં આવ્યો છે. આગળની તપાસ હરણી પોલીસે હાથ ધરી છે.
પોલીસે ઝડપી પાડેલા આરોપીઓમાં ફિરોઝ યાકૂબ દિવાન (રહે. આજવા રોડ, વડોદરા), અલ્તાફહુસૈન યાકુબહુસૈન દિવાન (રહે. યાકૂતપુરા, વડોદરા) અને રતનસિંગ જબ્બરસિંગ સોઢા (રહે. એકતાનગર, આજવા, વડોદરા)નો સમાવેશ થાય છે, જ્યારે 8 ફરાર આરોપીઓમાં ઝુબેર સફીક મેમણ (મુખ્ય આરોપી, રહે. વાડી, વડોદરા શહેર), ઝુબેરનો સાગરીત જાડિયો વ્યક્તિ, ઈનોવા ક્રિસ્ટા ગાડીનો ડ્રાઈવર અને ઝુબેરના પાંચ મજૂરોને વોન્ટેડ જાહેર કરાયા છે.
સ્ટેટ મોનિટરીંગ સેલની ટીમે આ દરોડામાં રૂ. 22,69,772ની 10,141 દારૂની બોટલ સહિત રૂ. 40 લાખની બે ગાડીઓ, રૂ. 15 હજારના ત્રણ મોબાઇલ મળી કૂલ રૂ. 62,88,492નો મુદ્દામાલ જપ્ત કર્યો છે. આ મામલે હરણી પોલીસ સ્ટેશન ખાતે ગુનો નોંધી સ્થળ પરથી ઝડપાયેલા ત્રણેય શખ્સોને પોલીસને સોંપવામાં આવ્યાં છે.
