વડોદરા શહેરના નંદેસરીની નોકરીયાત મહિલા પોતાના બગડી ગયેલા જીઓ ફાઈબરના એડેપ્ટર અંગે જીઓ ફાઈબર હેલ્પલાઇન સર્ચ કરતી વખતે સાયબર ઠગ ટોળકીનો ભેટો થઈ ગયો હતો. ટોળકીએ કસ્ટમર કેર નામની એપીકે ફાઈલ ડાઉનલોડ કરાવવાના બહાને બેંકમાં ચાલતી કાર લોન પર ટોપ લોનના બહાને રૂ.4,94,534 રૂપિયા કપાઈ ગયાની જાણ થતા જ મહિલાએ ગોરવા પોલીસ મથક અને સાયબર ક્રાઇમ પોલીસ સમક્ષ ફરિયાદ નોંધાવી હતી.
વડોદરા શહેરના સુભાનપુરા હાઈટેન્શન રોડના ફોરમ કોમ્પલેક્ષમાં રહેતા સુનિલભાઈ પટેલ નંદેસરીની કંપનીમાં નોકરી કરે છે. તેમના પત્ની મમતાબેન (ઉં.વ.54)નું બેંક એકાઉન્ટ આઈસીઆઈસીઆઈ બેંકમાં છે. તેમના જીઓ ફાઇબર નેટ કનેક્શનનું એડપ્ટર બગડી ગયું હતું. જેથી ગુગલ પર હેલ્પલાઇન નંબર શોધતા હતા ત્યારે તેમનો ભેટો સાયબર ઠગ ટોળકી સાથે થઈ ગયો હતો. જીઓ કસ્ટમર કેરમાંથી વાતચીત કરતા હોવાના બહાને ગઠિયાઓએ મહિલાની સાથે બે કલાક વાતો કરીને મહિલાને કસ્ટમર કેર એપીકે ફાઈલ તેમના મોબાઈલમાં ડાઉનલોડ કરાવી દીધી હતી. ત્યારબાદ જુદી-જુદી વાતોમાં ભોળવીને તેમના ખાતામાંથી કુલ રૂપિયા 37500 ઉપાડી લીધા હતા. પરંતુ મહિલાને દાળમાં કંઈક કાળું જણાતા તેમણે ફોન કટ કર્યો હતો. તપાસ કરતા તેમની સાથે ફ્રોડ થયાની જાણ થઈ હતી. પરિણામે તેમના ભત્રીજા મંથન જનકભાઈને સમગ્ર બનાવવાની જાણ કરતા તેમણે આઈસીઆઈસીઆઈ બેંકના કસ્ટમર ફેરમાં ખાતું અને ડેબિટ કાર્ડ બ્લોક કરવા જણાવ્યું હતું. પરંતુ નાણાની રકમ અંગે બેંકમાંથી જાણ થઈ હતી કે, તમારી ચાલતી કાર લોન પર ટોપ લોન થઈ ગઈ છે અને કુલ રૂપિયા 4,94,534 કપાઈ ગયાની જાણ કરી હતી. જેથી મમતાબેન સુનિલભાઈ પટેલે બનાવ અંગે ગોરવા પોલીસ મથકમાં ફરિયાદ નોંધાવી હતી.
