- સમાજમાં વધતી જતી રક્તની જરૂરિયાતને પહોંચી વળવા તથા જરૂરિયાતમંદ દર્દીઓના જીવનને બચાવવાના ઉદ્દેશથી આ શિબિરનું આયોજન કરવામાં આવ્યું

વડોદરા શહેરમાં માનવસેવા, સામાજિક જવાબદારી અને જનકલ્યાણના ઉદ્દેશ સાથે ફ્રીડમ ગ્રુપ દ્વારા એક વિશાળ રક્તદાન શિબિરનું આયોજન કરવામાં આવ્યું છે. સમાજમાં વધતી જતી રક્તની જરૂરિયાતને પહોંચી વળવા તથા જરૂરિયાતમંદ દર્દીઓના જીવનને બચાવવાના ઉદ્દેશથી આ શિબિરનું આયોજન કરવામાં આવ્યું છે.

આ રક્તદાન શિબિર

તારીખ : 14 ડિસેમ્બર 2025, રવિવાર

સમય : સવારે 8 વાગ્યાથી સાંજે 6 વાગ્યા સુધી

સ્થળ : રામ પાર્ટી પ્લોટ, વડસર રોડ, વડોદરા ખાતે આયોજિત કરવામાં આવશે.

રક્તદાન એ શ્રેષ્ઠ માનવસેવા છે. એક યુનિટ રક્તથી ત્રણ જેટલા દર્દીઓનું જીવન બચી શકે છે. અકસ્માત, પ્રસૂતિ, શસ્ત્રક્રિયા, થેલેસેમિયા, કેન્સર તથા અન્ય ગંભીર બીમારીઓથી પીડિત દર્દીઓ માટે રક્ત જીવનરેખા સમાન છે. આ મહત્વને ધ્યાને લઈ ફ્રીડમ ગ્રુપ દ્વારા નાગરિકોમાં રક્તદાન અંગે જાગૃતિ ફેલાવવાનો સતત પ્રયાસ કરવામાં આવે છે.

ફ્રીડમ ગ્રુપ દ્વારા વડોદરા શહેરના તમામ નાગરિકો, યુવાનો, સામાજિક કાર્યકરો, શૈક્ષણિક સંસ્થાઓ, સ્વૈચ્છિક સંસ્થાઓ તથા વિવિધ સંગઠનોને આ રક્તદાન શિબિરમાં વધુમાં વધુ સંખ્યામાં ઉપસ્થિત રહી રક્તદાન કરવા હાર્દિક અપીલ કરવામાં આવે છે.

આ રક્તદાન શિબિરમાં અનુભવી તબીબો તથા પ્રશિક્ષિત મેડિકલ સ્ટાફની દેખરેખ હેઠળ રક્તદાન કરવામાં આવશે. રક્તદાતાઓની આરોગ્ય સલામતી માટે તમામ જરૂરી તબીબી તપાસ, સ્વચ્છતા અને સાવચેતીના સંપૂર્ણ આયોજન કરવામાં આવ્યા છે. સાથે જ રક્તદાતાઓ માટે આરામ તથા અલ્પાહારની વ્યવસ્થા પણ ઉપલબ્ધ રહેશે.

ફ્રીડમ ગ્રુપ દ્વારા આયોજિત આ કાર્યક્રમ માત્ર રક્તદાન પૂરતો સીમિત નથી, પરંતુ માનવતા, એકતા અને સહકારના સંદેશને સમાજ સુધી પહોંચાડવાનો પ્રયાસ છે. રક્તદાન કરો  જીવન બચાવોના સંદેશ સાથે આ કાર્યક્રમ સમાજ માટે એક પ્રેરણારૂપ બનશે તેવી આયોજકોને આશા છે.