- હાલ નદીમાં પાણીનું લેવલ 9.2 મીટર જેટલું છે, એના કારણે રેડિયલની સફાઈ થઈ શકે તેમ નથી

- આશરે 1 મીટર જેટલું પાણી નીચે ઉતરે તે પછી રેડિયલની સફાઈ થશે અને માટી અને કાંપ રેડિયલમાંથી બહાર કાઢી બંને કૂવા ફરતે પોન્ડ બનાવવાની કામગીરી કરવામાં આવશે

ચોમાસા દરમિયાન વડોદરા મ્યુનિસિપલ કોર્પોરેશન મહી નદી ખાતે આવેલા ચાર ફ્રેન્ચ કૂવામાંથી પીવાનું પાણી મેળવે છે. આ ચાર ફ્રેંચ કૂવા પૈકી ફાજલપુર અને રાયકા કૂવામાં માટી અને કાંપ જમા થઈ જતા તેની અસર પાણી વિતરણ પર પડી છે. આ ફ્રેન્ચ કૂવાના રેડિયલમાં માટી અને કાંપ જમા થઈ જતા તેની સફાઈની કામગીરી દિવાળી બાદ નવેમ્બરથી કરવામાં આવશે. હાલ નદીમાં પાણીનું લેવલ 9.2 મીટર જેટલું છે, એના કારણે રેડિયલની સફાઈ થઈ શકે તેમ નથી. હજુ આશરે 1 મીટર જેટલું પાણી નીચે ઉતરે તે પછી રેડિયલની સફાઈ થશે અને માટી અને કાંપ રેડિયલમાંથી બહાર કાઢી બંને કૂવા ફરતે પોન્ડ બનાવવાની કામગીરી કરવામાં આવશે.

હાલમાં કોમ્પ્રેસર મારીને સફાઈની કામચલાઉ કામગીરી થઈ રહી છે. મહી નદીમાં ચોમાસા દરમિયાન ઉપરવાસમાંથી પાણી છોડાતા નદીમાં ભારે પૂર આવ્યા હતા. પૂરના કારણે પાણીમાં માટી અને કાંપ તણાઈને આવતા તેના કારણે આ સ્થિતિ ઊભી થઈ છે જોકે આ સમસ્યા દર વખતની છે. હાલમાં શહેરના છાણી, સમા, હરણી, કારેલીબાગ, લાલબાગ, જેલરોડ, સયાજી બાગ, આજવા, પાણીગેટ, ખોડીયાર નગર, એરપોર્ટ, વારસિયા વગેરે વિસ્તારને પાણીની અસર થઈ છે, અને પાણી ઓછું મળી રહ્યું છે. દરમિયાન મ્યુનિસિપલ કમિશનરે પણ કોર્પોરેશનના પાણી પુરવઠા વિભાગના અધિકારીઓ સાથે બંને કૂવાની વિઝીટ કરી હતી અને પરિસ્થિતિ નિહાળી હતી.

બીજું શહેરમાં હાલ પાણીની તકલીફ પણ ઊભી થઈ છે. કોર્પોરેશન કુલ 680 એમએલડી પાણીનો જથ્થો મેળવે છે, પરંતુ વિતરણ વ્યવસ્થામાં ખામી હોવાથી તેમજ લાઈન લીકેજ વગેરેના કારણે પાણીનો લોસ થતાં આશરે 600 એમએલડી પાણી મળે છે. હાલમાં મહિના બંને કૂવાની અસરના કારણે 12 એમએલડી પાણીનો જથ્થો ઓછો મળે છે ,પરંતુ કોર્પોરેશન દ્વારા 10 એમ.એલ.ડી નો જથ્થો ઇન્ટરલિંક વોટર સિસ્ટમ દ્વારા ભરપાઈ કર્યો છે, અને બાકી બે એમએલડી જથ્થાની ઘટ પણ ટૂંક સમયમાં પૂર્ણ કરી દેવામાં આવશે.