- કાર રોકવા જતાં LRD જવાનના હાથનું કડું ફસાઈ જતા તેઓ દરવાજા પર લટકાઈ ગયા હતા, બાદમાં ચાલક 800 મીટર સુધી તેમને લટકેલી હાલતમાં ઘસડી જતાં બંને પગે ઇજા પહોંચી હતી

શહેરના સોમાતળાવ ચાર રસ્તા પાસે બ્લેક ફિલ્મ વાળી ઇકો ગાડીને ઉભી રાખવાનો ઈશારો કરતા ચાલકે ઉભી રાખી ન હતી. એલઆરડી જવાને હાથ આડો કર્યો હોય તેમ છતાં ઉભી ન રાખતા એલઆરડી જવાનનું કડુ ફસાઈ જતા તેઓ દરવાજા પર લટકાઈ ગયા હતા. બાદમાં 800 મીટર સુધી તેમને લટકેલી હાલતમાં ચાલક ઘસડી ગયો હતો, જેમાં તેમને ઇજાઓ પણ પહોંચી હતી.

આ મામલે ટ્રાફિક પોલીસ જવાને પાણીગેટ પોલીસ મથકમાં ઇકો ચાલક વિરુદ્ધ ફરિયાદ નોંધાવી છે. વડોદરા શહેરના ટ્રાફિક પોલીસ વિભાગમાં એલઆરડી તરીકે ફરજ બજાવતા જીતેન્દ્રભાઈ પ્રેમાજીએ ફરિયાદમાં જણાવ્યું છે કે, 8 સપ્ટેમ્બરના રોજ સાંજના સમયે સોમાતળાવ ચાર રસ્તા પાસે આવેલ ખેતલા આપા ટી-સ્ટોલ સામે બ્લેક કાચની ફિલ્મવાળી ઈકો ગાડીનો ચાલક પુરઝડપે અને બેદરકારી પુર્વક ચલાવતો હતો. જેથી મેં આ બ્લેક ફિલ્મ વાળી ગાડીના ચાલકને ઉભી રાખવાના ઇશારો કરતા તેને ઊભી રાખી હતી. કેમ પૂર ઝડપે ગાડી દોડાવે છે એમ કહેતા આ ચાલક અતુલભાઈ રણછોડભાઈ રાઠવાએ તુરંત જ ભગાવી હતી.

બાદમાં જવાને તેને ઉભી રાખવા સાથે મારો જમણો હાથ આડો કરતા મારા હાથમાં પહેરેલ કડુ ગાડીના ડ્રાઈવર સાઈડના વચ્ચેના દરવાજામાં ફસાઇ ગયું હતું. તેમ છત ગાડી ચાલકે તેની ગાડી હંકારી રાખી હતી. ગાડીનો દરવાજો પકડી લીધો હતો અને મને આશરે 800 મીટર જેટલો દુર લટકતા લઈ ગયો હતો. તે દરમ્યાન અવારનવાર તેને ગાડી ઉભી રાખવાનું જણાવતા તેને ગાડી નહીં ઉભી રાખી મારા બન્ને પગ પર ઇજા પહોંચાડી હતી. ત્યારબાદ ગાડીમાંથી નીચે ઉતરી ભાગી ગયો હતો. જેથી આ કાર ચાલક અતુલ રાઠવાને ઝડપી તેની પાસે લાયસન્સ ન હોય કાર્યવાહી હાથ ધરી છે.