- મુક્ત કરાયેલા 10 બાળકો અને તેમના સગા-સંબંધીઓનું એન્ટી હ્યુમન ટ્રાફિકિંગ યુનિટની ટીમે કાઉન્સેલિંગ કરી બાળકોને ફરીથી બાળ મજૂરીમાં ન જાય તે માટે જરૂરી સમજ આપી

વડોદરા શહેરના ન્યુ વીઆઈપી રોડ પર આવેલા નાગબાનગર-2 ખાતે જ્યોતિ બોટલીંગ નામની સોડાની ફેક્ટરીમાંથી 10 બાળકોને એન્ટી હ્યુમન ટ્રાફિકિંગ યુનિટે મુક્ત કરાવ્યા છે. જ્યાં બાળકો પાસે બાળમજૂરી કરવામાં આવતી હતી. પોલીસે ફેક્ટરી માલિક સામે ગુનો નોંધીને આ મામલે વધુ તપાસ શરૂ કરી છે.

વડોદરા એન્ટી હ્યુમન ટ્રાફિકિંગ યુનિટને હરણી પોલીસ સ્ટેશન વિસ્તારમાં પેટ્રોલિંગ દરમિયાન બાતમી મળી હતી કે, જ્યોતિ બોટલીંગ ફેક્ટરીનો માલિક સગીર બાળકો પાસે બાળ મજૂરી કરાવી તેમનું આર્થિક અને માનસિક શોષણ કરે છે. આ બાતમીના આધારે એન્ટી હ્યુમન ટ્રાફિકિંગ યુનિટ (AHTU)ની ટીમે ફેક્ટરીમાં તપાસ કરી હતી. જેમાં 10 સગીર બાળકો કામ કરતા જોવા મળ્યા હતા.

આ બાળકોનું આર્થિક અને માનસિક શોષણ થઈ રહ્યું હોવાનું જણાતાં ફેક્ટરીના માલિક પ્રકાશ ઠાકુર કેશવાણી (રહે. પ્રેમ પ્રકાશ આશ્રમ સામે, વારસિયા, વડોદરા) વિરુદ્ધ હરણી પોલીસ સ્ટેશનમાં ફરિયાદ નોંધવામાં આવી છે અને ફેક્ટરી માલિક વિરુદ્ધ જુવેનાઈલ જસ્ટિસ એક્ટ-2015ની કલમ-79 અને ચાઈલ્ડ લેબર (પ્રોહિબિશન એન્ડ રેગ્યુલેશન) એક્ટ-1986ની કલમ-14 મુજબ ગુનો નોંધીને કાયદેસર કાર્યવાહી શરૂ કરવામાં આવી છે.

મુક્ત કરાયેલા 10 બાળકો અને તેમના સગા-સંબંધીઓનું એન્ટી હ્યુમન ટ્રાફિકિંગ યુનિટની ટીમ દ્વારા યોગ્ય કાઉન્સેલિંગ કરવામાં આવ્યું હતું અને બાળકોને ફરીથી બાળ મજૂરીમાં ન જાય તે માટે જરૂરી સમજ આપવામાં આવી હતી અને તેમને તેમના સગા-સંબંધીઓને સોંપવામાં આવ્યા હતા.

એન્ટી હ્યુમન ટ્રાફિકિંગ યુનિટના પીઆઇ બી.બી. પટેલે જણાવ્યું હતું કે, બાળકોનું આર્થિક અને માનસિક શોષણ થઈ રહ્યું હોવાની બાતમી મળતા અમારી ટીમ સ્થળ ઉપર પહોંચી ગઈ હતી અને 10 બાળકોને મુક્ત કરાવ્યા હતા અને બાળકોને તેમના પરિવારને સોંપવામાં આવ્યા હતા અને તેમનું કાઉન્સિલિંગ પણ કરવામાં આવ્યું હતું.