- ગોલ્ડન ચોકડી નજીક હોટલમાં જમી દંપતી સહિત ત્રણ વ્યક્તિ મોપેડ પર પરત ઘરે જતાં હતા

- પૂરઝડપે ધસી આવેલી બલેનો કારે મોપેડને અડફેટમાં લઇ ઢસડી કાર ડિવાઇડર ઉપર ચઢાવી દીધી, ઘટનામાં 28 વર્ષના યુવાનનું મોત, બે યુવતીને ઇજા, અકસ્માત સર્જી કારચાલક ફરાર

વડોદરા-હાલોલ રોડ પર આવેલા ભાવપુરા નજીક એક ગમખ્વાર માર્ગ અકસ્માત સર્જાયો હતો. આ દુર્ઘટનામાં 28 વર્ષીય યુવકનું ઘટનાસ્થળે જ કરુણ મોત નિપજ્યું હતું. હોટેલમાં જમીનને ઘરે પરત જતી વખતે ગમખ્વાર અકસ્માત સર્જાયો હતો. અકસ્માતમાં મૃતકની પત્ની સહિત બેને ઇજાઓ પહોંચી હતી. ઇજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા.

વડોદરાના ગોલ્ડન ચોકડી નજીક સંગમ હોટલમાં જમીને દંપતી સહિત ત્રણ વ્યક્તિ પોતાના મોપેડ ઉપર જરોદ નજીકના ભાવપુરા ગામે જતા હતા ત્યારે ભાવપુરા ગામના પાટીયા નજીક પૂરઝડપે ધસી આવેલી બલેનો કારે મોપેડને અડફેટમાં લઇ ઢસડી કાર ડિવાઇડર ઉપર ચઢાવી દીધી હતી. આ ઘટનામાં 28 વર્ષના યુવાનનું મોત નિપજ્યું હતું. જ્યારે બે યુવતીને ઇજા પહોંચી હતી. આ બનાવ અંગે અકસ્માત સર્જી ફરાર થઇ ગયેલા કારચાલક સામે જરોદ પોલીસે ગુનો નોંધી તપાસ હાથ ધરી છે.

પોલીસ સૂત્રો પાસેથી જાણવા મળતી વિગતો અનુસાર, વાઘોડિયાના ભાવપુરા ગામે રહેતા ચેતનકુમાર દેવસિંહ ગોહિલ (ઉ.વ. 28) તેની પત્ની તન્વી અને પડોશમાં રહેતા શેતલબેન કિરણભાઇ પઢિયાર મોડી રાત્રે જમવા માટે ગોલ્ડન ચોકડી નજીક આવ્યા હતા અને ત્રણે જમી મોડી રાત્રે ભાવપુરા પરત જતા હતા ત્યારે ભાવપુરા ગામના પાટીયા નજીક વળતી વખતે અચાનક પૂરઝડપે ધસી આવેલી બલેનો કારે મોપેડને અડફેટમાં લઇ રોડ ઉપર ઢસડી કાર ડિવાઇડર ઉપર ચઢાવી દીધી હતી.

આ અકસ્માતમાં મોપેડ સવાર ત્રણેય રોડ ઉપર ફંગોળાયા હતા. જેમાં ચેતનકુમાર ગોહિલને ગંભીર ઇજા થઇ હોવાથી 108ની મદદથી કારેલીબાગની ખાનગી હોસ્પિટલમાં ખસેડવામાં આવ્યા હતા. જ્યાં મોડીરાત્રે જ ટૂંકી સારવાર દરમિયાન મોત નિપજ્યું હતું. જ્યારે તેમની પત્ની અને અન્ય એક યુવતીને ઈજા પહોંચી હતી.

જરોદ પોલીસે તન્વી ગોહિલની ફરિયાદના આધારે અકસ્માત સર્જી ફરાર થઇ ગયેલા બલેનો કારના ચાલક સામે ગુનો નોંધી તપાસ હાથ ધરી છે. આ બનાવની વધુ તપાસ પી.એસ.આઇ. એસ.એલ. શેવાળે કરી રહ્યા છે.