- ગૂગલ મીટ પર વાત કરાવી કરારો મોકલી વિશ્વાસ જીત્યો, રકમ મળ્યા બાદ આરોપીઓએ મોબાઇલ બંધ કરી દીધા, ફરિયાદીએ 1930 પર જાણ કરતાં સાયબર ક્રાઇમમાં ફરિયાદ નોંધાઈ

વડોદરા શહેરના કારેલીબાગ વિસ્તારમાં રહેતા અને હાલ દુબઈમાં એકાઉન્ટન્ટ તરીકે નોકરી કરતા 57 વર્ષીય વ્યક્તિને ગોવામાં પ્રોપર્ટીમાં રોકાણ કરાવી સારો નફો અપાવવાની લાલચ આપીને સાયબર ગઠિયાઓએ 10.75 લાખ રૂપિયા પડાવી લીધા છે. આ મામલે સાયબર ક્રાઇમ પોલીસ સ્ટેશનમાં નોંધાઈ છે. મોબાઇલ પર સંપર્ક કરનાર શખ્સે ગૂગલ મીટ મારફતે અન્ય વ્યક્તિ સાથે વાત કરાવી તેમજ વિવિધ કરારો મોકલી વિશ્વાસ સંપાદન કર્યા બાદ રૂપિયા ટ્રાન્સફર કરાવ્યા હતા.

વડોદરાના કારેલીબાગની સતકાર સોસાયટીમાં રહેતા અને હાલ દુબઈની એક કંપનીમાં એકાઉન્ટન્ટ તરીકે નોકરી કરતા આધેડે સાયબર ક્રાઇમ પોલીસ સ્ટેશનમાં નોધાવેલી ફરિયાદ મુજબ, ઓગસ્ટ-2025માં તેમના મિત્ર અને તેમનો પરિવાર ગોવા ફરવા ગયો હતો. ત્યાં બાગા બીચ પર 32ND એવેન્યુ કંપનીની પ્રોપર્ટી ઈન્વેસ્ટમેન્ટ સ્કીમનું હોલ્ડિંગ જોવા મળ્યું હતું. ત્યારબાદ મિત્રની પત્નીએ ફરિયાદીની વાત અનંત શુક્લા નામના શખ્સ સાથે કરાવી હતી. અનંતે રાહુલ મેહરા સાથે ગૂગલ મીટ પર વાત કરાવી ગોવામાં પ્રોપર્ટીમાં રોકાણની સ્કીમ સમજાવી હતી.

આરોપીઓએ ફરિયાદીને 3 કરાર પણ મોકલ્યા હતા, જેના કારણે ફરિયાદીને રોકાણની સ્કીમ સાચી હોવાનું જણાયું હતું. જેથી તેમણે પોતાના બેંક ખાતામાંથી 10.75 લાખ રૂપિયા અનંત શુક્લાએ જણાવેલા બેંક ખાતામાં ટ્રાન્સફર કર્યા હતા. જોકે, રકમ ટ્રાન્સફર કર્યા બાદ આરોપીઓનો વારંવાર સંપર્ક કરવા છતાં કોઈ જવાબ મળ્યો નહોતો અને મોબાઇલ પણ બંધ કરી દીધો હતો. પોતાની સાથે છેતરપિંડી થઈ હોવાનું જણાતા ફરિયાદીએ સાયબર ક્રાઇમ હેલ્પલાઇન 1930 પર જાણ કરી હતી. જેના આધારે વડોદરા સાયબર ક્રાઇમ પોલીસે ગુનો નોંધીને વધુ તપાસ હાથ ધરી છે.