વડોદરા શહેરના વ્યસ્ત ગણાતા ફતેગંજ બ્રિજ પર આજે વહેલી સવારે એક માર્ગ અકસ્માતની ઘટના બની હતી, જેમાં ગુજરાત રાજ્ય પરિવહન નિગમની એસટી બસ અને એક ખાનગી આઈ-10 કાર વચ્ચે જોરદાર ટક્કર થઈ હતી. સદનસીબે આ અકસ્માતમાં કોઈ જાનહાનિના સમાચાર પ્રાપ્ત થયા નથી, પરંતુ કારને ભારે નુકસાન પહોંચ્યું છે.
ઘટનાની વિગત મુજબ, વડોદરાના ફતેગંજ બ્રિજ પરથી પસાર થઈ રહેલી એસટી બસ અને i10 કાર વચ્ચે અચાનક અકસ્માત સર્જાયો હતો. ટક્કર એટલી જોરદાર હતી કે કારના આગળ અને પાછળ ભાગનો કચ્ચરઘાણ વળી ગયો હતો અને ગાડીને મોટું આર્થિક નુકસાન થયું હતું. સવારના સમયે આ અકસ્માત સર્જાયો હોવાથી બ્રિજ પરથી પસાર થતા અન્ય વાહનચાલકોમાં પણ ફાળ પડી હતી. અકસ્માતને પગલે બ્રિજ પર વાહનોની લાંબી કતારો લાગી ગઈ હતી અને ટ્રાફિક જામના દ્રશ્યો સર્જાયા હતા, જેના કારણે નોકરી-ધંધા પર જતા લોકોને ભારે હાલાકીનો સામનો કરવો પડ્યો હતો.
અકસ્માતની જાણ થતાની સાથે જ સ્થાનિક પોલીસની ટીમ ઘટનાસ્થળે દોડી આવી હતી. પોલીસે તુરંત જ ટ્રાફિક હળવો કરવાની કામગીરી હાથ ધરી હતી અને અકસ્માતગ્રસ્ત વાહનોને માર્ગ પરથી દૂર ખસેડવાની તજવીજ શરૂ કરી હતી. પ્રાથમિક તપાસમાં કોઈને ગંભીર ઈજા થઈ હોવાનું જાણવા મળ્યું નથી, જે મોટી રાહતની વાત છે. હાલ પોલીસે આ મામલે ગુનો નોંધી અકસ્માત કેવી રીતે સર્જાયો તે દિશામાં વધુ તપાસ હાથ ધરી છે.
