- પોલીસે આરોપી પ્રવીણ પંચાલ, રમેશ શીખલીગર અને શીતલ પંચાલની ધરપકડ કરી

વડોદરાના લક્ષ્મીપુરા વિસ્તારમાં યુવકના હત્યા કેસમાં 3 આરોપીની ધરપકડ કરી છે. 'આજે તો જેલ ભોગવવાની થાય તો ભોગવી લઈશ પણ આ પીયુષને પતાવી દેવો છે', તેમ કહીને ત્રણ લોકો યુવકને ઘરમાં ખેંચી ગયા હતા. આ સમયે યુવકને ઢોરમાર મારતા તેને ગંભીર ઇજાઓ થઈ હતી, જેમાં તેનું મોત થયુ હતું.

વડોદરા શહેરના સમતા વિસ્તારમાં આવેલ ભેંસાસુરનગર ઝુપડપટ્ટીમાં રહેતા ઉષાબેન મગનભાઈ રાઠોડ (ઉં.57) એ લક્ષ્મીપુરા પોલીસ સ્ટેશનમાં નોંધાવેલી ફરિયાદમાં જણાવ્યું છે કે, અમારા પડોશી પ્રવિણભાઈ મોહનભાઈ પંચાલ અને અમારા મકાનની વચ્ચેના ભાગે સંયુક્તમાં એક ખાળકુવો બનાવ્યો છે. આ કુવો એકાદ બે વર્ષે ભરાઈ જતો હોવાથી કોર્પોરેશનમાં જાણ કરી ખાલી કરાવીએ છીએ અને આ કુવો 20 દીવસથી ભરાઈ ગયો હતો, જે ખાલી કરાવવા માટે પ્રવિણભાઈ પંચાલને અવારનવાર વાત કરી હતી. પરંતુ તેઓ આ વાતને ધ્યાને લેતા નહોતા અને અમારી વચ્ચે બોલાચાલી થતી હતી.

આ દરમિયાન બુધવારે સાંજના 9 વાગ્યે મારો દીકરો પીયુષ પ્રવિણભાઈને કહેવા ગયો હતો. તે દરમિયાન તેઓના ઘરે પ્રવિણભાઈ, તેમની પત્ની શીતલબેન અને તેમના બનેવી રમેશભાઈ હાજર હતા. તેઓ એકદમ ઉશ્કેરાઈ જઈને જોરજોરથી બોલતા હતા, જેથી હું ઘરની બહાર આવી ગઈ હતી. આ સમયે પ્રવીણભાઈ તથા રમેશભાઈએ મારા દિકરાને પકડી રાખ્યો હતો અને શિતલબેન એમ બોલતા કે, આજ તો જેલ ભોગવવાની થાય તો ભોગવી લઈશ પણ આ પીયુષને પતાવી દેવો છે, તેમ કહીને અને આ ત્રણેયે મારા દીકરાને તેમના ઘરમાં ખેંચી લઈ ગયા હતા.

આ સમયે આસપાસના માણસો ભેગા થતા મારા દીકરાને તેઓ પાસેથી છોડાવવા ઘરમાં જતી વખતે મારો દીકરો તેઓ પાસેથી છટકીને બહાર આવી માથુ પકડી બેસી ગયો હતો. ત્યારબાદ થોડીવારમાં ઢળી પડ્યો હતો, જેથી અમારી પડોશમાં રહેતા મહેશભાઈ માળીએ 108 એમ્બ્યુલન્સ બોલાવી હતી. અમારા જમાઈ ગીરવતસિંહ મારા દીકરાને સારવાર માટે ગોત્રી હોસ્પિટલમાં લઈ ગયા હતા, જ્યાં ફરજ પરના ડોક્ટરે મારા દીકરા પીયુષને મૃત જાહેર કર્યો હતો.

પ્રવિણભાઈ મોહનભાઈ પંચાલ, તેમના પત્ની શીતલબેન પંચાલ (બન્ને રહે ભૈસાસુરનગર ઝુપડપટ્ટી, સી.એચ વિધ્યાલય સામે, સમતા, સુભાનપુરા, વડોદરા) અને તેમના બનેવી રમેશભાઈ છગનભાઈ સીખલીગર (રહે. ભાગ્યલક્ષ્મી સોસાયટી, સમતા, વડોદરા) ભેગા મળી ગડદા પાટુનો માર મારી આંતરીક ઈજા પહોંચાડીને મારી નાંખ્યો છે. જેથી મેં આ ત્રણેય સામે લક્ષ્મીપુરા પોલીસ સ્ટેશનમાં ફરિયાદ નોંધાવી છે. આ કેસમાં લક્ષ્મીપુરા પોલીસે આરોપી પ્રવીણ પંચાલ, રમેશ શીખલીગર અને શીતલ પંચાલની ધરપકડ કરી છે.