- આયુર્વેદિક ત્રણ રસ્તા પાસે આવેલ SBI એટીએમ નજીકથી આરોપી સાહિલ શેખની ધરપકડ કરી 500ના દરની 16 ચલણી નોટો (રૂ.8,000 રોકડા) અને 1 મોબાઈલ ફોન કબ્જે કરાયો

- પિતા હોસ્પિટલમાં છે અને એટીએમ કાર્ડ ચાલતું નથી કહી સામે વાળાનું સ્કેનર માંગી નકલી એપમાં પૈસા ટ્રાન્સફર થઈ ગયાનો બોગસ મેસેજ બતાવી બદલામાં રોકડ લઈ લેતો હતો

વડોદરા શહેર ક્રાઇમ બ્રાન્ચે ટેકનોલોજીનો દુરુપયોગ કરી નિર્દોષ નાગરિકો સાથે વિશ્વાસઘાત અને છેતરપિંડી આચરતા એક રીઢા ગુનેગારને ઝડપી પાડ્યો છે. આરોપી એટીએમ સેન્ટર બહાર ઊભા રહી પિતા હોસ્પિટલમાં દાખલ હોવાનું ખોટું બહાનું બતાવી, નકલી પેટીએમ (Paytm) એપ મારફતે ઓનલાઇન નાણાં જમા થયાનો મેસેજ બતાવી સામેની વ્યક્તિ પાસેથી રોકડ રકમ પડાવી લેતો હતો.

ક્રાઇમ બ્રાન્ચની ટીમે મળાલી ચોક્કસ બાતમીના આધારે આયુર્વેદિક ત્રણ રસ્તા પાસે આવેલ SBI એટીએમ નજીકથી આરોપી સાહિલ જાફરભાઈ શેખ (ઉં.વ. 27, રહે. બદ્રી મહોલ્લા, વાડી, વડોદરા) ને દબોચી લીધો હતો. આરોપી પાસેથી 500ના દરની 16 ચલણી નોટો (રૂ.8,000 રોકડા) અને 1 મોબાઈલ ફોન કબ્જે કરવામાં આવ્યો છે. ગત 16 ઓગસ્ટના રોજ હરણી રોડ પર આવેલ એટીએમ નજીક એક નાગરિક સાથે રૂ.8,000 ની છેતરપિંડી આચરી હતી, જે અંગે વારસિયા પોલીસ સ્ટેશનમાં ગુનો નોંધાયો હતો. આરોપીને આગળની કાયદેસરની કાર્યવાહી માટે વારસિયા પોલીસને સોંપાયો છે.

પોલીસ તપાસમાં આરોપીના મોબાઈલમાંથી ટેલિગ્રામ ચેનલ મારફતે મેળવેલી નકલી પેટીએમ એપ મળી આવી હતી. આરોપી એટીએમ મશીનમાં પૈસા જમા કરાવવા કે ઉપાડવા આવતા લોકોને ટાર્ગેટ કરતો હતો. તે પોતાના પિતા હોસ્પિટલમાં છે અને એટીએમ કાર્ડ ચાલતું નથી તેમ કહી સામે વાળાનું સ્કેનર માંગી પોતાની નકલી એપમાં પ્રોસેસ કરી પૈસા ટ્રાન્સફર થઈ ગયાનો બોગસ મેસેજ બતાવતો હતો અને બદલામાં રોકડ રકમ લઈ લેતો હતો. પ્રાથમિક પૂછપરછમાં તેણે આ જ રીતે 3 વ્યક્તિઓ સાથે ઠગાઈ કરી હોવાની વિગતો ખુલી છે.

ઝડપાયેલો આરોપી સાહિલ શેખ રીઢો ગુનેગાર છે અને તેની સામે અગાઉ વાડી પોલીસ સ્ટેશનમાં સગીરાની છેડતી કરવાનો તેમજ પાણીગેટ પોલીસ સ્ટેશનમાં પણ ગંભીર ગુનાઓ નોંધાયેલા છે.