- ઘટનાની જાણ થતાં જ ડાયલ-112ની ટીમ તાત્કાલિક સ્થળ પર પહોંચી હતી અને સ્થિતિને કાબૂમાં લીધી હતી
- ઇજાગ્રસ્તોને સારવાર માટે સયાજી હોસ્પિટલ ખાતે ખસેડવામાં આવ્યા
વડોદરાના તાંદલજા વિસ્તારમાં કેટલાક શખ્સોએ તીક્ષ્ણ હથિયાર વડે હુમલો કરતા એક યુવકનું માથું ફૂટ્યું હતું અને લોહીલુહાણ થઈ ગયો હતો. જ્યારે અન્ય એક યુવકને સામાન્ય ઈજા થઈ હતી. જેથી બંનેને સયાજી હોસ્પિટલમાં સારવાર માટે ખસેડવામાં આવ્યા હતાં. ઘટના બાદનો વીડિયો સોશિયલ મીડિયામાં વાયરલ થયો છે. વાયરલ થયેલા વીડિયોમાં એક ઘાયલ વ્યક્તિ લોહીલુહાણ હાલતમાં જોવા મળી હતી. ઘટનાને લઈને સ્થાનિકોમાં ભયનો માહોલ પણ સર્જાયો હતો.
ઘટનાની જાણ થતાં જ ડાયલ-112ની ટીમ તાત્કાલિક સ્થળ પર પહોંચી હતી અને સ્થિતિને કાબૂમાં લીધી હતી. ઇજાગ્રસ્તોને સારવાર માટે સયાજી હોસ્પિટલ ખાતે ખસેડવામાં આવ્યા છે. જેપી રોડ પોલીસ દ્વારા વધુ તપાસ હાથ ધરવામાં આવી રહી છે.
ઇજાગ્રસ્ત યુવકે સુફિયાને જણાવ્યું હતું કે, હું તાંદલજા વિસ્તારમાં આવેલા એકતા નગરમાં ચા પીવા ગયો હતો. ત્યાં કેટલાક લોકોએ મારા પર હુમલો કરી દીધો હતો. મારી પાસે જે પૈસા હતા તે પણ છીનવી લીધા હતા, જેથી હું ત્યાંથી ભાગી ગયો હતો. તેઓએ તલવારો અને પાઇપથી મારા પર હુમલો કર્યો હતો. મને માર્યો એ અમજદ દારૂની સ્મગલિંગ કરે છે. હું તો બસ ચા પીવા જ ગયો હતો. મારી પાસે પૈસા જોઈને તેણે મારા પર હુમલો કરી દીધો હતો. તેણે આવીને મને કહ્યું કે 'મને પૈસા આપી દે'. મેં ના પાડી કે 'હું નહીં આપું', એટલે તેણે હુમલો કરી દીધો. તેની સાથે બીજા 6-7 લોકો પણ હતા.
ઇજાગ્રસ્ત યુવકના પિતા ઈશ્તખાર ખાન એ જણાવ્યું હતું કે, મારો દીકરો ત્યાં ચા પીવા માટે ગયો હતો. તે જ્યારે ચા પી રહ્યો હતો, ત્યારે તે લોકોએ તેના પાસે 20થી 25 હજાર જેટલા રૂપિયા જોયા અને તે છીનવવાનો પ્રયત્ન કર્યો અને છીનવી લીધા હતા. ત્યારબાદ તેને માર માર્યો હતો અને તલવાર વડે તેના પર હુમલો કરી દીધો હતો. એક છોકરાએ મને ફોન કરીને આ વિશે જણાવ્યું હતું, ત્યારે અમે અમારા દીકરાને ત્યાંથી સારવાર માટે સયાજી હોસ્પિટલમાં દાખલ કર્યો છે.
તેઓએ વધુમાં જણાવ્યું હતું કે, એ લોકોએ મારા દીકરા પાસે પૈસા જોયા હતા. તે લોકો ચરસી છે અને દારૂ-ગાંજાનો ધંધો કરે છે. અમે પોલીસને જાણ કરી નથી, કારણ કે, મારા દીકરાનો જીવ બચાવવા માટે અમે તેને તાત્કાલિક સયાજી હોસ્પિટલ લઈને ભાગ્યા હતા. હવે અમે જે.પી. રોડ પોલીસ સ્ટેશનમાં જઈશું. અત્યારે તો અમારી એ જ માંગ છે કે આરોપીઓ સામે કડકમાં કડક કાર્યવાહી કરવામાં આવે. જો કાર્યવાહી નહીં થાય તો અમે ઉચ્ચ કક્ષાએ રજૂઆત કરીશું.
