- ચોમાસાની શરૂઆતમાં જ મુખ્ય માર્ગ ધસી જતાં નાગરિકોમાં રોષ

- વ્યસ્ત માર્ગ પર ભૂવો પડતાં વાહનચાલકોને હાલાકી, તાત્કાલિક સમારકામ માટે સ્થાનિકોની માંગ

એક તરફ સ્માર્ટ સિટીના મોટા મોટા બોર્ડ મારીને પોતાની પીઠ થપથપાવતું વડોદરા મહાનગર પાલિકાનું તંત્ર, બીજી તરફ સમા-સાવલી રોડ પર પડેલો મસમોટો ભૂવો. આ તસ્વીર વડોદરાના વહીવટની અસલી કહાની કહી રહી છે. શહેરના મુખ્ય માર્ગો પર પડેલા આ ગાબડાં માત્ર રસ્તાની ખરાબી નથી, પરંતુ પાલિકાની પ્રી-મોન્સુન કામગીરીના નામે થયેલા ભ્રષ્ટાચારના ખાડા છે.

શહેરમાં વરસાદની શરૂઆત થાય તે પહેલાં જ પ્રી-મોન્સુન કામગીરીના નામે લાખો-કરોડોનો ધુમાડો કરતી વડોદરા મહાનગર પાલિકાના તંત્રની પોલ વધુ એક વખત ખુલ્લી પડી છે. સમા-સાવલી રોડ જેવા અત્યંત વ્યસ્ત વિસ્તારમાં લાડલી પાર્ટી પ્લોટની બાજુમાં અને શેલ પેટ્રોલ પંપ પાસે પડેલો મસમોટો ભૂવો પાલિકાના વિકાસના દાવાઓની મજાક ઉડાવી રહ્યો છે. જાણે પાલિકાએ નાગરિકોને રસ્તાની મધ્યમાં જ પાતાળલોકની સફર કરાવવા માટે આ ખાસ વ્યવસ્થા કરી હોય તેમ આ ભૂવો વાહનચાલકો માટે મોતનું મરણિયો સાબિત થઈ રહ્યો છે.

તંત્રની બેદરકારીનું આ જીવંત ઉદાહરણ છે. હજુ તો ચોમાસાની મધ્યમ શરૂઆત છે ત્યાં જ રસ્તાઓનું આવું હાલત એ દર્શાવે છે કે ટેક્સના પૈસાનો ઉપયોગ રોડ બનાવવા માટે નહીં, પણ માત્ર ખાડાઓનું સામ્રાજ્ય ઉભું કરવા માટે થયો છે. અધિકારીઓ અને કોન્ટ્રાક્ટરોની મિલીભગતનું પરિણામ આજે સામાન્ય નાગરિકે ભોગવવું પડી રહ્યું છે. શું વડોદરાના નાગરિકોનો અધિકાર માત્ર ખાડાવાળા રસ્તા પર જ ગાડી ચલાવવાનો છે ?

સવાલ એ છે કે શું વડોદરા મહાનગર પાલિકા કોઈ મોટી દુર્ઘટના ઘટશે ત્યારે જ જાગશે ? સમા-સાવલી જેવા ગીચ વિસ્તારમાં પડેલો આ ભૂવો ગમે ત્યારે કોઈનું જીવલેણ અકસ્માત સર્જી શકે છે. તંત્ર માત્ર કાગળ પર પ્રી-મોન્સુન કામગીરીનું સર્ટિફિકેટ લેવામાં વ્યસ્ત છે, જ્યારે વાસ્તવિકતા જમીન પરના આ મોટા ગાબડાં (ભૂવા) દ્વારા સાબિત થઈ રહી છે. હવે સમય આવી ગયો છે કે વડોદરાની જનતા જાગૃત થાય અને જવાબદાર અધિકારીઓ પાસેથી આ ખાડા-રાજનો જવાબ માંગે.

વડોદરા પાલિકાએ સ્માર્ટ સિટીનું લેબલ બદલીને હવે ખાડા-સિટી રાખવાનો સમય આવી ગયો છે. વિકાસના ડામર નીચે દબાયેલા ભ્રષ્ટાચારના આ ભૂવાઓ હવે વડોદરાની જનતાના ધીરજના બાંધ તોડી રહ્યા છે.