- પોલીસે મકાનમાં રહેતા લોકોને સલામત બહાર કાઢ્યા, આગથી ધુમાડાના ગોટેગોટા છવાયા હતા

વડોદરામાં ગણેશ વિસર્જન વચ્ચે યાકુતપુરા વિસ્તારમાં રહેણાંક મકાનમાં અચાનક ભીષણ આગ લાગતા અફરાતફરીનો માહોલ સર્જાયો હતો. મકાનના ત્રીજા માળે આગ લાગતાં આસપાસના વિસ્તારમાં પણ દોડધામ મચી ગઈ હતી. ઘટનાની જાણ થતાં ફાયર બ્રિગેડની ટીમો તાત્કાલિક સ્થળ પર પહોંચી હતી.
યાકુતપુરા વિસ્તારમાં આવેલા એક રહેણાંક મકાનના ત્રીજા માળે આગ લાગતાં ધુમાડાના ગોટેગોટા જોવા મળ્યા હતા. આગના કારણે મકાનમાં રહેલા લોકોમાં ભયનો માહોલ સર્જાયો હતો. આગની ગંભીરતાને ધ્યાનમાં રાખીને પોલીસે નજીકના મકાનમાં રહેતા લોકોને સુરક્ષિત રીતે બહાર કાઢી રેસ્ક્યૂ કર્યા હતા.

બીજી તરફ ફાયર બ્રિગેડની ટીમે સ્થળ પર પહોંચી આગ બુઝાવવાની કામગીરી હાથ ધરી હતી. ફાયર બ્રિગેડના જવાનોએ ભારે જહેમત ઉઠાવી આગ પર કાબૂ મેળવ્યો હતો. આગની ઘટનામાં મકાનને મોટું નુકસાન થયું હતું. જોકે સદનસીબે આ ઘટનામાં કોઈ જાનહાનિ થઈ નથી.
ડીસીપી એન્ડ્રયુ મેકવાને જણાવ્યું હતું કે, ગણેશ વિસર્જન યાત્રા પસાર થઈ રહી હતી એ સમયે અડાણિયા પુલ ચાર રસ્તા પાસે આવેલા એક મકાનમાં અકસ્માતે આગ લાગવાની ઘટના બની હતી. ઘટના સ્થળે હાજર પોલીસે તાત્કાલિક સક્રિય થઈને લોકોને સુરક્ષિત સ્થળે ખસેડ્યા હતા તેમજ પાછળના ભાગે આવેલા મકાનમાં રહેલા લોકોને પોલીસ અને સ્થાનિકોની મદદથી સલામત રીતે રેસ્ક્યુ કરી લેવામાં આવ્યા હતા.

તેઓએ વધુમાં જણાવ્યું હતું કે, ફાયર બ્રિગેડની ટીમે ઘટનાસ્થળે પહોંચીને આગ પર સંપૂર્ણ કાબૂ મેળવી લીધો છે અને આ બનાવમાં કોઈપણ પ્રકારની જાનહાનિ થઈ નથી. આ અંગે કોઈ અફવા ન ફેલાવવા જણાવાયું છે. હાલમાં સમગ્ર રૂટ પર ગણેશ વિસર્જન યાત્રા કોઈ પણ વિઘ્ન વગર અત્યંત શાંતિપૂર્ણ રીતે આગળ વધી રહી છે.