- નિરવભાઇ વાળાએ કારનું અંતિમ લોકેશન તપાસ કરતાં રાજસ્થાન હોવાનું સામે આવ્યું, આરોપી બે દિવસનું ભાડું અને ડિપોઝીટ આપી ૩ દિવસ માટે કાર ભાડે લઇ ગયો હતો

વડોદરા શહેરમાં કાર ભાડે લઈ ગયેલા વ્યક્તિએ રાજસ્થાનમાં કાર સગેવગે કરી દીધી હોવાનું સામે આવતા રાવપુરા પોલીસે ફરિયાદના આધારે આરોપી સામે ગુનો નોંધ્યો છે.

મૂળ ભાવનગરના વતની અને હાલ શહેરના ગોત્રી વિસ્તારમાં રહેતા નિરવભાઇ વાળા ખાનગી હોસ્પિટલમાં નોકરી કરે છે. નિરવભાઇ વાળાએ નોંધાવેલી ફરિયાદ અનુસાર, વર્ષ 2025 દરમિયાન તેણે પોતાના મિત્ર અનિલ બલદાણીયાના નામે કાર ખરીદી હતી. આ કાર તે ઓળખીતાઓને જરૂરી દસ્તાવેજો લઈ પ્રતિદિન રૂ.3 હજારના ભાડે આપતો હતો.

ગત તા.20 ફેબ્રુઆરીના રોજ કુરજીભાઈ વાળાના મારફતે કાર અત્તાઉર રહેમાન સાકિર મેમણ (રહે. શાંતિવન સોસાયટી, તાંદળજા, વડોદરા) ને ત્રણ દિવસ માટે ભાડે આપવામાં આવી હતી. આરોપીએ બે દિવસના ભાડા અને ડિપોઝિટ તરીકે કુલ રૂ.15,500 જમા કરાવ્યા હતા. જોકે ત્યારબાદ અત્તાઉર રહેમાનનો સંપર્ક થઈ શક્યો નહોતો. ફરિયાદી દ્વારા દસ્તાવેજોના આધારે તાંદળજાના સરનામે તપાસ કરતા જાણવા મળ્યું કે આરોપી છેલ્લા ત્રણ વર્ષથી ત્યાં રહેતો નથી. અન્ય એક સરનામે તેના પરિવારજનોએ પોલીસ ફરિયાદ ન કરવા અને એક-બે દિવસમાં કાર પરત આપી દેવાની ખાતરી આપી હતી. પરંતુ આજદિન સુધી કાર પરત મળી નથી.

તપાસ દરમિયાન કારનું અંતિમ લોકેશન રાજસ્થાનમાં હોવાનું સામે આવ્યું હતું. વધુ તપાસમાં જાણવા મળ્યું કે રાજસ્થાનના પોખરણ વિસ્તારમાં આશરે રૂ.8 લાખની કિંમતની કાર સગેવગે કરી દેવામાં આવી છે. આ મામલે રાવપુરા પોલીસે આરોપી અત્તાઉર રહેમાન સાકિર મેમણ સામે વિશ્વાસઘાત સહિતની કલમો હેઠળ ગુનો નોંધી વધુ તપાસ હાથ ધરી છે.