- ચા-પાણી પીવા રોકાયેલા કન્સ્ટ્રક્શન કંપનીના એન્જિનિયર કર્મચારીઓના પગાર અને સપ્લાયરોને ચૂકવણી માટે રોકડ લઈ જતા હતા, અજાણ્યા તસ્કરો સામે પોલીસની તપાસ
વડોદરા-અમદાવાદ નેશનલ હાઇવે નંબર 48 પર દેણા ચોકડી પાસે કાર પાર્ક કરીને ચા-પાણી પીવા ગયેલા કન્સ્ટ્રક્શન કંપનીના એન્જિનિયરની કારનો કાચ તોડી તસ્કરો 35 લાખ રૂપિયાની રોકડ ભરેલી બેગ ચોરી કરીને ફરાર થઈ ગયા હતા. એન્જિનિયર માત્ર 10 મિનિટમાં પરત ફર્યા ત્યારે કારનો કાચ તૂટેલો અને રોકડ ભરેલી બેગ ગાયબ જોવા મળી હતી. દિવાળીના તહેવાર પહેલાં કર્મચારીઓના પગાર અને સપ્લાયરોને પેમેન્ટ માટે લઈ જવાતી માતબર રોકડની ચોરી થતાં ચકચાર મચી છે. આ મામલે પોલીસે વધુ તપાસ હાથ ધરી છે.
શહેર નજીક દેણા ચોકડી પાસે પાર્ક કરેલી કારનો કાચ તોડી 35 લાખ રૂપિયાની રોકડ ભરેલી બેગની ચોરી થઈ છે. હાલોલની કન્સ્ટ્રક્શન કંપનીના એન્જિનિયર રોમલકુમાર જશુભાઈ પટેલ (ઉં.વ.31)એ આ મામલે નોંધાવેલી ફરિયાદ મુજબ, રોમલકુમાર પટેલ હાલોલ GIDC વિસ્તારમાં આવેલી રૂબામીંગ પ્રા.લિ. અને હિટાચી એનર્જી સહિતની કંપનીઓના બાંધકામ પ્રોજેક્ટમાં કો-ઓર્ડિનેટર તરીકે ફરજ બજાવે છે. તેમની કંપનીમાં 10થી 15 તારીખ વચ્ચે કર્મચારીઓ અને વર્કરોને પગાર ચૂકવવાનો હતો. ઉપરાંત દિવાળીના તહેવારને ધ્યાનમાં રાખીને સપ્લાયરોને પણ પેમેન્ટ આપવાનું હોવાથી રોકડની વ્યવસ્થા કરવામાં આવી હતી. કંપનીની ઉઘરાણીમાંથી અગાઉ મળેલા રૂ.5 લાખ તેમની બેગમાં રાખેલા હતા.
10 ઓક્ટોબરના રોજ સાંજે આશરે 430 વાગ્યે તેઓ હાલોલમાં ઘોઘરા રોડ પર રાજધાની હોટેલ સામે આવેલી નમો આંગડિયા પેઢી ખાતે પહોંચ્યા હતા. ત્યાંથી રૂ.30 લાખ રોકડા મેળવી અગાઉના રૂ.5 લાખ સાથે રૂ.35 લાખ બેગમાં મૂક્યા હતા. ત્યારબાદ તેઓ કિયા સેલ્ટોસ કારમાં રોકડ લઈને વડોદરા જવા નીકળ્યા હતા. સાંજે આશરે 545 વાગ્યે દેણા ચોકડી પાસે કાર પાર્ક કરીને લોક કરી તેઓ નજીકના કોમ્પ્લેક્સમાં ચા-પાણી પીવા ગયા હતા.
10 મિનિટ બાદ પરત ફરતાં કારની ડ્રાઇવર તરફના પાછળના દરવાજાનો કાચ તૂટેલો જોવા મળ્યો હતો. કારમાં મૂકેલી 35 લાખ રૂપિયાની રોકડ ભરેલી બેગ પણ ગાયબ હતી. આસપાસ તપાસ કરવા છતાં બેગનો પત્તો ન લાગતાં તેમણે ઓફિસના કર્મચારી, કંપનીના માલિક અને મામાને જાણ કરી પોલીસનો સંપર્ક કર્યો હતો.
દિવાળીના તહેવાર પહેલાં કર્મચારીઓના પગાર અને સપ્લાયરોના પેમેન્ટ માટે લઈ જવાતી આટલી મોટી રોકડની ચોરીના બનાવમાં પોલીસે અજાણ્યા તસ્કરને શોધવા તપાસ હાથ ધરી છે. કારનો કાચ તોડીને બેગની ચોરી કરનાર શખ્સો કોણ હતા અને તેમને રોકડની હિલચાલની અગાઉથી જાણ હતી કે કેમ તે સહિતના મુદ્દા તપાસનો વિષય બન્યા છે.
