- દુમાડ ચોકડી નજીક હોટેલ તુલીપ પાસે એક ગંભીર રોડ અકસ્માતની ઘટના બનતા ઘાયલ દર્દીને તાત્કાલિક 108 એમ્બ્યુલન્સ મારફતે સયાજી હોસ્પિટલમાં ખસેડાયો હતો

વડોદરા શહેર નજીક દુમાડ ચોકડી પાસે અકસ્માતમાં ઘાયલ વ્યક્તિને બચાવીને 108 એમ્બ્યુલન્સની ટીમે તેના 2.75 લાખની કિંમતના સોનાના દાગીના પરત કર્યા હતા. અકસ્માત બાદ કિંમતી માલસામાન પરત કરી 108 એમ્બ્યુલન્સના કર્મચારીઓએ પ્રમાણિક્તાનું પ્રેરક ઉદાહરણ પૂરૂ પાડ્યું હતું.

વડોદરા પાસે દુમાડ ચોકડી નજીક હોટેલ તુલીપ પાસે એક ગંભીર રોડ અકસ્માતની ઘટના બની હતી. જેમાં એક બાઈકસવાર યુવક લોડિંગ ટ્રક પાછળ ટકરાતા ગંભીર રીતે ઘાયલ થયો હતો. આ ઘટનાની જાણ થતાં 108 એમ્બ્યુલન્સ ત્યાં પહોંચી ગઇ હતી. ઈએમટી ગંગાબેન બારિયા અને પાઇલોટ ઇસ્માઈલભાઈ દુધવાલા દ્વારા તરતજ ઘાયલને પ્રાથમિક સારવાર આપી અને તેમની ગંભીર અવસ્થાને જોતા તેમને તરત એસએસજી હોસ્પિટલ ખસેડવામાં આવ્યા હતા. દર્દીની પાસે અંદાજે રૂ. 2.75 લાખની કિંમતના દાગીના હતા. જેમાં હાર, પેન્ડલ, કાનની બુટ્ટીઓ ઉપરાંત એક મોબાઇલ ફોન મળી આવ્યો હતો.

108ની ટીમે આ તમામ કિંમતી માલમત્તાને સંપૂર્ણ સુરક્ષિત રીતે સંભાળીને તેમના નાના ભાઈ રાકેશભાઈનો સંપર્ક કર્યો અને તેમને એસએસજી હોસ્પિટલ ખાતે બોલાવ્યા હતા. પોલીસની હાજરીમાં દર્દીની માલમત્તાની સોંપણી તેમના પરિવારજનોને કરવામાં આવી હતી. 108ની ટીમે ઘાયલ બાઇકસવારને જીવ બચાવવાનું કાર્ય જ નહીં પણ, તેમનો કિંમતી માલસામાન પરત કરી પ્રમાણિક્તાનું પ્રેરક ઉદાહરણ પૂરૂ પાડ્યું હતું.